យោងតាមការចុះផ្សាយពីប្រភពបរទេស ភាពចាស់មិនមែនបង្ហាញតែតាមសក់ស្កូវ ឬស្នាមជ្រីវជ្រួញប៉ុណ្ណោះទេ។ ការផ្លាស់ប្តូរតូចៗក្នុងជីវិតប្រចាំថ្ងៃ ដូចជា ត្រូវការទីពឹងពេលធ្វើកិច្ចការងាយៗ គេងមិនស្រួល កម្លាំងកាន់របស់ថយចុះ ឬរក្សាលំនឹងមិនបានល្អ ក៏អាចជាសញ្ញាថារាងកាយកំពុងប្រែប្រួលតាមអាយុផងដែរ។
សញ្ញាទី១ គឺសកម្មភាពប្រចាំថ្ងៃចាប់ផ្តើមត្រូវការជំនួយ ឬទីពឹង ដូចជា ពេលឈរលាងចានត្រូវពឹងលើកន្លែងណាមួយ ដើម្បីរក្សាលំនឹង។ សញ្ញាទី២ គឺសមត្ថភាពដឹង និងទទួលអារម្មណ៍ពីជុំវិញថយចុះ ដូចជា ពិបាកទំពារអាហាររឹង ស្តាប់សំឡេងមិនសូវច្បាស់ ឬមិនសូវដឹងក្តៅត្រជាក់ដូចមុន។
សញ្ញាទី៣ គឺគុណភាពនៃការគេងថយចុះ ដូចជា ពិបាកគេង គេងមិនស្កប់ ឬគេងបានខ្លីជាងមុន។ សញ្ញាទី៤ គឺពិបាកអង្គុយចុះ ឬក្រោកពីទីតាំងអង្គុយទាប ដោយអាចពាក់ព័ន្ធនឹងការថយចុះនៃកម្លាំងសាច់ដុំ ការរក្សាលំនឹង និងសុខភាពសន្លាក់។
សញ្ញាទី៥ គឺកម្លាំងសាច់ដុំ និងកម្លាំងកាន់ដៃថយចុះ ដែលអាចធ្វើឱ្យការលើករបស់ធ្ងន់ បើកដប ឬការងារប្រចាំថ្ងៃកាន់តែពិបាក។ សញ្ញាទី៦ គឺចាប់ផ្តើមមិនសូវចូលចិត្តសកម្មភាពដែលត្រូវការថាមពល ដូចជា ដើរឆ្ងាយ រត់ ឬធ្វើកីឡា ព្រោះរាងកាយងាយនឿយហត់ និងត្រូវការពេលស្តារខ្លួនយូរជាងមុន។
ការចាស់គឺជាដំណើរការដែលមិនអាចជៀសផុត ប៉ុន្តែការរក្សាទម្លាប់រស់នៅសមស្រប និងបន្តធ្វើសកម្មភាពរាងកាយ អាចជួយឱ្យរាងកាយមានសមត្ថភាពធ្វើចលនា និងបំពេញការងារប្រចាំថ្ងៃបានល្អជាងមុន។ ប្រសិនបើការផ្លាស់ប្តូរទាំងនេះកើតឡើងខ្លាំង ឬកាន់តែធ្ងន់ គួរយកចិត្តទុកដាក់លើសុខភាព និងពិគ្រោះអ្នកជំនាញសុខភាព៕