យោងតាមការចុះផ្សាយពីប្រភពបរទេស ដើម្បីថែរក្សាសុខភាពខួរក្បាល អាហារដែលជ្រើសរើស និងរបៀបរក្សាទុក ក៏ដូចជាការចម្អិន មានសារៈសំខាន់។ វេជ្ជបណ្ឌិតផ្នែកខួរក្បាលបានណែនាំឱ្យប្រុងប្រយ័ត្នចំពោះអាហារ ៣ប្រភេទដែលអាចបង្កហានិភ័យ ប្រសិនបើអាហារទាំងនោះខូច ឬរៀបចំមិនបានត្រឹមត្រូវ។
អាហារកំប៉ុងដែលមានសភាពប៉ោង ច្រេះ ឬប៉ះទង្គិចខូចខាតខ្លាំង មិនគួរទិញ ឬបរិភោគឡើយ។ អ្នកជំនាញព្រមានថា កំប៉ុងដែលខូចអាចបង្កលក្ខខណ្ឌឱ្យសារធាតុពុលមួយចំនួនកើតឡើង ហេតុនេះគួរបោះចោលភ្លាមៗ និងមិនគួរសាកភ្លក់ដើម្បីពិនិត្យថាអាចញ៉ាំបានឬអត់។
សាច់ជ្រូកឆៅ ឬមិនឆ្អិនល្អ ក៏គួរប្រុងប្រយ័ត្នដែរ ព្រោះអាចមានប៉ារ៉ាស៊ីតដែលបង្កបញ្ហាសុខភាព និងក្នុងករណីខ្លះអាចប៉ះពាល់ដល់ប្រព័ន្ធប្រសាទ។ ដូច្នេះ គួរចម្អិនសាច់ជ្រូកឱ្យឆ្អិនល្អ ជៀសវាងសាច់ឆៅ ម្ហូបឈាម និងសាច់ដែលមិនប្រាកដប្រភព។
ត្រីសមុទ្រខ្នាតធំ ដែលស្ថិតនៅកំពូលខ្សែសង្វាក់អាហារ ដូចជា ត្រីបារ៉ាគូដា ត្រីក្រហមធំ និងត្រីថ្មមួយចំនួន ក៏គួរជ្រើសរើសដោយប្រុងប្រយ័ត្ន។ ត្រីប្រភេទនេះអាចប្រមូលផ្តុំជាតិពុលធម្មជាតិមួយចំនួន ដែលមិនងាយបាត់បង់តាមការចម្អិន ឬបង្កក ដូច្នេះគួរជ្រើសរើសត្រីដែលមានប្រភពច្បាស់លាស់ និងជៀសវាងត្រីសមុទ្រខ្នាតធំដែលមិនប្រាកដប្រភព។
ជាមួយគ្នានេះ ការថែសុខភាពខួរក្បាលគួរផ្តោតលើការទទួលទានអាហារដែលមានតុល្យភាព ដូចជា ស៊ុត ត្រីមានខ្លាញ់ល្អ គ្រាប់ធញ្ញជាតិ ផ្លែបឺរី និងបន្លែស្លឹកបៃតង។ ការជ្រើសរើសអាហារស្រស់ មានប្រភពច្បាស់លាស់ រក្សាទុកបានត្រឹមត្រូវ និងចម្អិនឱ្យបានល្អ អាចជួយកាត់បន្ថយហានិភ័យពីអាហារដែលមិនមានសុវត្ថិភាព៕