យោងតាមការចុះផ្សាយពីប្រភពបរទេស ចេកណាំវ៉ា ជាផ្លែឈើងាយរក និងមានជាតិប៉ូតាស្យូម ម៉ាញេស្យូម និងសរសៃអាហារ។ ចេកដែលមិនទាន់ទុំខ្លាំង ក៏មានម្សៅដែលរំលាយយឺតមួយប្រភេទ ដែលប្រភពបានលើកឡើងថា អាចជួយដល់ពោះវៀន និងពាក់ព័ន្ធនឹងការគ្រប់គ្រងជាតិស្ករក្នុងឈាម។
សម្រាប់អ្នកដែលកំពុងយកចិត្តទុកដាក់លើជាតិស្ករ និងទម្ងន់ ពេលព្រឹក ត្រូវបានប្រភពចាត់ទុកថា ជាពេលសមរម្យសម្រាប់ញ៉ាំចេក។ អាចញ៉ាំជាមួយអាហារពេលព្រឹក ឬជាអាហារសម្រន់ពេលព្រឹក ដោយប្រភពបានពន្យល់ថា នៅពេលនេះរាងកាយអាចប្រើជាតិស្ករបានល្អជាងមុន។
ប្រភពក៏ណែនាំឱ្យ កុំញ៉ាំចេកនៅពេលពោះទទេ ប្រសិនបើកំពុងព្យាយាមគ្រប់គ្រងជាតិស្ករ។ វិធីមួយទៀត គឺញ៉ាំចេកជាមួយអាហារដែលមានប្រូតេអ៊ីន ឬខ្លាញ់ល្អ ដូចជា យ៉ាអួរ ឬគ្រាប់ធញ្ញជាតិ ព្រោះអាចជួយឱ្យជាតិស្ករចូលក្នុងឈាមយឺតជាងមុន និងធ្វើឱ្យឆ្អែតបានយូរ។
ចំពោះបរិមាណ ប្រភពណែនាំថា អ្នកដែលត្រូវគ្រប់គ្រងជាតិស្ករក្នុងឈាម អាចញ៉ាំប្រហែល កន្លះផ្លែដល់១ផ្លែក្នុងមួយថ្ងៃ និងជ្រើសរើសចេកដែលមិនទាន់ទុំខ្លាំងពេក។ វិធីនេះត្រូវបានប្រភពលើកឡើងថា អាចជួយកាត់បន្ថយការទទួលជាតិស្ករច្រើនពេក ខណៈនៅតែទទួលបានសរសៃអាហារ និងសារធាតុចិញ្ចឹមពីចេក។
ជារួម ប្រសិនបើចង់ញ៉ាំចេកណាំវ៉ា ដើម្បីគាំទ្រការគ្រប់គ្រងជាតិស្ករ គួរយកចិត្តទុកដាក់លើ ពេលវេលា បរិមាណ និងអាហារដែលញ៉ាំជាមួយ។ ជ្រើសរើសញ៉ាំពេលព្រឹក មិនញ៉ាំច្រើនពេក និងអាចញ៉ាំជាមួយប្រូតេអ៊ីន ឬខ្លាញ់ល្អ។ សម្រាប់អ្នកមានជំងឺទឹកនោមផ្អែម គួរគ្រប់គ្រងអាហារទាំងមូលក្នុងមួយថ្ងៃ មិនមែនពឹងលើចេកតែមួយមុខឡើយ៕