យោងតាមការចុះផ្សាយពីប្រភពបរទេស មនុស្សខ្លះមិនសូវផឹកទឹកស្អាតទេ ប៉ុន្តែជ្រើសរើសទឹកផ្អែម តែទឹកដោះគោ កាហ្វេ ទឹកផ្លែឈើ ឬភេសជ្ជៈផ្សេងៗជំនួស។ ការធ្វើបែបនេះមិនមានន័យថារាងកាយខ្វះទឹកជានិច្ចទេ ព្រោះភេសជ្ជៈមួយចំនួនក៏អាចផ្តល់ជាតិទឹកបាន។ ប៉ុន្តែបើផឹកភេសជ្ជៈដែលមានស្ករ អំបិល ឬជាតិកាហ្វេអ៊ីនច្រើនជាប្រចាំ អ្នកអាចទទួលបានសារធាតុទាំងនេះលើសតម្រូវការ។
បញ្ហាដែលអាចកើតឡើង គឺ ឡើងទម្ងន់ និងប្រឈមជំងឺទឹកនោមផ្អែមប្រភេទទី២។ ទឹកផ្អែម និងភេសជ្ជៈដែលបន្ថែមស្ករ អាចផ្តល់ថាមពលច្រើន ប៉ុន្តែមិនធ្វើឱ្យឆ្អែតបានយូរ។ ប្រសិនបើផឹកជាញឹកញាប់ អាចធ្វើឱ្យថាមពលលើសតម្រូវការ និងបង្កើនហានិភ័យឡើងទម្ងន់ ហើយជាតិស្ករខ្ពស់ជាប្រចាំក៏អាចពាក់ព័ន្ធនឹងជំងឺទឹកនោមផ្អែមផងដែរ។
ការផឹកទឹកផ្អែមច្រើនក៏អាច ពាក់ព័ន្ធនឹងខ្លាញ់រុំថ្លើម ខ្លាញ់ក្នុងឈាមខ្ពស់ និងបញ្ហាបេះដូង។ ជាតិស្ករលើស អាចធ្វើឱ្យខ្លាញ់កើនឡើងនៅក្នុងថ្លើម និងអាចធ្វើឱ្យខ្លាញ់មួយចំនួនក្នុងឈាមកើនឡើង។ បើកើតជាមួយការឡើងទម្ងន់ ជាតិស្ករខ្ពស់ ឬសម្ពាធឈាមខ្ពស់ ហានិភ័យបញ្ហាបេះដូង និងសរសៃឈាមអាចកើនឡើងក្នុងរយៈពេលវែង។
ក្រៅពីនេះ ធ្មេញអាចពុក រលាកសន្លាក់ដោយសារអាស៊ីតអ៊ុយរិកខ្ពស់ និងកើតក្រួសក្នុងតម្រងនោម ក៏អាចពាក់ព័ន្ធនឹងទម្លាប់ផឹកមិនល្អផងដែរ។ ភេសជ្ជៈផ្អែមអាចបង្កើនការប៉ះពាល់ស្ករ និងអាស៊ីតទៅលើធ្មេញ ខណៈការទទួលសារធាតុផ្អែមមួយចំនួនច្រើន អាចពាក់ព័ន្ធនឹងអាស៊ីតអ៊ុយរិកខ្ពស់។ ចំណែកការទទួលជាតិទឹកមិនគ្រប់ អាចធ្វើឱ្យទឹកនោមខាប់ និងបង្កើនឱកាសកើតក្រួសក្នុងតម្រងនោម។
ជារួម ទឹកស្អាតគួរតែជាភេសជ្ជៈសំខាន់ប្រចាំថ្ងៃ ខណៈតែ កាហ្វេ ឬភេសជ្ជៈគ្មានស្ករអាចរាប់ជាជាតិទឹកបាន ប៉ុន្តែគួរជ្រើសរើសឱ្យសមរម្យ។ គួរកាត់បន្ថយទឹកផ្អែម ទឹកផ្លែឈើដែលបន្ថែមស្ករ និងភេសជ្ជៈដែលមានជាតិកាហ្វេអ៊ីនច្រើន។ ប្រភពក៏ណែនាំឱ្យមនុស្សទូទៅទទួលជាតិទឹកប្រហែល ៦–៨កែវក្នុងមួយថ្ងៃ ប៉ុន្តែតម្រូវការពិតប្រាកដអាស្រ័យលើអាកាសធាតុ សកម្មភាព និងស្ថានភាពសុខភាពរបស់ម្នាក់ៗ៕