យោងតាមការចុះផ្សាយពីប្រភពបរទេស ស្លឹកត្របែក មិនត្រឹមតែប្រើក្នុងការធ្វើម្ហូបទេ ប៉ុន្តែមនុស្សជាច្រើនក៏យកមកឆុង ឬស្ងោរជាទឹកតែផឹកផងដែរ។ តាមប្រភព ស្លឹកត្របែកមានសារធាតុធម្មជាតិជាច្រើន ហើយត្រូវបានប្រើតាមបែបបុរាណសម្រាប់ជួយសម្រួលបញ្ហារំលាយអាហារ ជាពិសេសរាគ និងបញ្ហាពោះវៀនមួយចំនួន។
អត្ថប្រយោជន៍មួយទៀត គឺ អាចជួយគ្រប់គ្រងជាតិស្ករក្នុងឈាម។ ការសិក្សាមួយចំនួនបានរកឃើញថា សារធាតុនៅក្នុងស្លឹកត្របែកអាចជួយបន្ថយការស្រូបយកជាតិស្ករ និងជួយឱ្យជាតិស្ករឡើងយឺតជាងមុន។ ទោះយ៉ាងណា លទ្ធផលនេះមិនមានន័យថា ទឹកតែស្លឹកត្របែកអាចព្យាបាលជំងឺទឹកនោមផ្អែមបានទេ។
ស្លឹកត្របែកក៏ អាចជួយថែខ្លាញ់ក្នុងឈាម និងបេះដូង ផងដែរ។ ប្រភពបានលើកឡើងពីការសាកល្បងមួយនៅជប៉ុនរយៈពេល ៨សប្តាហ៍ លើមនុស្ស ២៣នាក់ ដែលមានខ្លាញ់ក្នុងឈាមខ្ពស់កម្រិតស្រាល ឬនៅកម្រិតជិតខ្ពស់។ លទ្ធផលបានឃើញថា ការផឹកតែស្លឹកត្របែកអាចជួយបន្ថយកូឡេស្តេរ៉ុលសរុប ហើយកម្រិតកូឡេស្តេរ៉ុលមិនល្អក៏ថយចុះនៅមនុស្សមួយចំនួន។
មួយចំណុចទៀត គឺស្លឹកត្របែកមាន សារធាតុធម្មជាតិដែលជួយការពារកោសិកា ដូចជា សារធាតុប្រឆាំងការខូចខាតមួយចំនួន។ ប្រភពបានលើកឡើងថា សារធាតុទាំងនេះអាចពាក់ព័ន្ធនឹងការជួយគាំទ្រសុខភាពទូទៅ។ ប៉ុន្តែការសិក្សាដែលមានសព្វថ្ងៃនៅមានកម្រិត ដូច្នេះមិនគួរអះអាងថា ទឹកតែស្លឹកត្របែកអាចព្យាបាលជំងឺណាមួយដោយផ្ទាល់ឡើយ។
ជារួម ទឹកតែស្លឹកត្របែកអាចជាភេសជ្ជៈមួយដែលមានប្រយោជន៍ខ្លះ ជាពិសេសសម្រាប់ការរំលាយអាហារ និងអាចពាក់ព័ន្ធនឹងការគ្រប់គ្រងជាតិស្ករ និងខ្លាញ់ក្នុងឈាម។ ប៉ុន្តែមិនគួរផឹកច្រើនពេក ឬយកមកជំនួសទឹកស្អាតប្រចាំថ្ងៃ និងថ្នាំដែលគ្រូពេទ្យបានណែនាំទេ។ អ្នកមានជំងឺប្រចាំកាយ ឬកំពុងប្រើថ្នាំ គួរពិគ្រោះជាមួយអ្នកជំនាញសុខភាព មុនពេលផឹកជាប្រចាំ៕