ជំងឺថ្លើមខ្លាញ់ ត្រូវបានគេប្រសិទ្ធនាមថាជា «ឃាតករស្ងៀមស្ងាត់» ព្រោះនៅដំណាក់កាលដំបូង វាស្ទើរតែមិនបង្ហាញរោគសញ្ញាច្បាស់លាស់ណាមួយឡើយ។ មនុស្សភាគច្រើនរស់នៅជាមួយកោសិកាថ្លើមដែលពោរពេញដោយជាតិខ្លាញ់ រហូតទាល់តែថ្លើមចាប់ផ្តើមរលាក ឬខូចខាតធ្ងន់ធ្ងរ ទើបដឹងខ្លួន។
ទម្លាប់នៃការហូបចុកផ្តេសផ្តាស ដូចជា ៖ ការញ៉ាំអាហារផ្អែមខ្លាំង អាហារបំពងមានខ្លាញ់ច្រើន ការផឹកភេសជ្ជៈកំប៉ុង និងគ្រឿងស្រវឹងហួសប្រមាណ សុទ្ធសឹងជាដើមហេតុចម្បងដែលរញ៉េរញ៉ៃដល់ប្រព័ន្ធរំលាយអាហារ និងដុតបំផ្លាញរបស់ថ្លើម ។
ដើម្បីការពារសុខភាពរបស់អ្នកឱ្យបានទាន់ពេលវេលា នេះជា អាការៈសញ្ញាអាសន្ន ៤ យ៉ាង ដែលរាងកាយកំពុងដាស់តឿនថា ថ្លើមរបស់អ្នកកំពុងរងសម្ពាធខ្លាំងពីជាតិខ្លាញ់៖
១. ល្វើយ និងហត់នឿយខុសធម្មតា
ទោះបីជាអ្នកគេងលក់ស្ងប់ស្ងាត់ និងបានគ្រប់គ្រាន់យ៉ាងណាក៏ដោយ ក៏អ្នកនៅតែមានអារម្មណ៍ថាល្វើយ កម្លាំងលែងមាន និងអស់កម្លាំងល្ហិតល្ហៃពេញមួយថ្ងៃ។ នៅពេលជាតិខ្លាញ់កើនឡើងច្រើនក្នុងថ្លើម វារាំងស្ទះដល់សមត្ថភាពរបស់ថ្លើមក្នុងការបំប្លែងអាហារឱ្យទៅជាថាមពល និងការបន្សាបជាតិពុលក្នុងរាងកាយ ដែលធ្វើឱ្យរាងកាយត្រូវធ្វើការធ្ងន់ធ្ងរជាប្រចាំ រហូតស្តែងចេញជាភាពល្វើយ។
២. អារម្មណ៍ណែន ឬចុកអួលនៅក្រោមឆ្អឹងជំនីរខាងស្តាំ
ថ្លើមស្ថិតនៅផ្នែកខាងស្តាំផ្នែកខាងលើនៃពោះ។ នៅពេលកោសិកាថ្លើមផ្ទុកទៅដោយជាតិខ្លាញ់ច្រើនជ្រុល វាធ្វើឱ្យថ្លើមរីកមាឌធំជាងមុន និងរលាក ។ ការរលាកនេះអាចបង្កឱ្យមានអារម្មណ៍ស្រាលៗដូចជា ចុកអួលៗ ណែនៗ ឬអួលដើមទ្រូងផ្នែកខាងស្តាំក្រោមឆ្អឹងជំនីរ ដែលមនុស្សភាគច្រើនជឿថាជាបញ្ហាក្រពះទៅវិញ។
៣. ពោះអើម ឬដុះក្បាលពោះខ្លាំង
ប្រសិនបើអ្នកសង្កេតឃើញថា ក្បាលពោះរបស់អ្នកចាប់ផ្តើមដុះធំយ៉ាងលឿន ខុសប្លែកពីមុន ឬមានអារម្មណ៍ថាពោះប៉ោងអើមចង់ក្អួតជានិច្ច នោះអាចជាសញ្ញានៃការសន្សំជាតិខ្លាញ់ក្នុងសរីរាង្គខាងក្នុង (Visceral Fat) ។ ការសន្សំជាតិខ្លាញ់ជុំវិញចង្កេះ និងក្បាលពោះ មានទំនាក់ទំនងផ្ទាល់យ៉ាងជិតស្និទ្ធបំផុតទៅនឹងការកើតមានជំងឺថ្លើមខ្លាញ់។
៤. ស្បែក និងប្រកែវភ្នែកប្រែជាពណ៌លឿងស្រអាប់
នេះជាសញ្ញាអាសន្នធ្ងន់ធ្ងរដែលបញ្ជាក់ថា ថ្លើមរបស់អ្នកចាប់ផ្តើមខូចខាតមុខងារបន្សាបជាតិពុលហើយ។ នៅពេលថ្លើមមិនអាចដំណើរការបំបែកសារធាតុ ប៊ីលីរុយប៊ីន (Bilirubin) បានល្អ ជាតិពណ៌លឿងនេះនឹងជ្រាបចូលទៅក្នុងចរន្តឈាម បណ្តាលឱ្យស្បែក និងផ្នែកសនៃភ្នែកប្រែជាពណ៌លឿង ព្រមទាំងអាចមានអាការៈរមាស់ស្បែកដោយគ្មានមូលហេតុផងដែរ។