យោងតាមការចុះផ្សាយពីប្រភពបរទេស ពេលអាកាសធាតុចាប់ផ្តើមត្រជាក់ កណ្ដុរតែងស្វែងរកកន្លែងកក់ក្តៅ ស្ងាត់ និងមានអាហារ ដើម្បីលាក់ខ្លួន និងធ្វើសំបុក។ ប្រភពបានលើកឡើងថា កណ្ដុរមានច្រមុះងាយទទួលក្លិនខ្លាំងៗ ដូច្នេះក្លិនមួយចំនួនអាចធ្វើឱ្យវាមិនសូវចូលចិត្តកន្លែងនោះ។ ប៉ុន្តែវិធីទាំងនេះគ្រាន់តែអាចជួយបណ្តេញកណ្ដុរប៉ុណ្ណោះ មិនមែនជាវិធីធានាថាកណ្ដុរនឹងបាត់ទាំងស្រុងទេ។
ក្លិនទី១ គឺក្រដាសក្រអូបសម្រាប់ម៉ាស៊ីនសម្ងួតខោអាវ។ ប្រសិនបើនៅមានក្លិន អាចយកទៅដាក់នៅជ្រុងបន្ទប់ ក្រោយទូ ឬកន្លែងដែលធ្លាប់ឃើញកណ្ដុរ។ នៅពេលក្លិនចុះខ្សោយ អាចប្តូរថ្មី។ ក្លិនទី២ គឺក្លិនរបស់ឆ្មា ព្រោះកណ្ដុរតែងប្រុងប្រយ័ត្នចំពោះសត្វឆ្មា។ អ្នកមានឆ្មានៅផ្ទះ អាចប្រើរបស់ដែលមានក្លិនឆ្មានៅកន្លែងដែលកណ្ដុរតែងលាក់ខ្លួន ប៉ុន្តែគួរដាក់ឱ្យឆ្ងាយពីកន្លែងរៀបចំ និងទុកអាហារ។
ក្លិនទី៣ គឺក្លិនជីរអង្កាម។ អាចដាក់ប្រេងក្លិនជីរអង្កាមបន្តិចលើសំឡី ហើយដាក់នៅជ្រុងផ្ទះ ក្រោមបង្អួច ឬកន្លែងដែលឃើញស្នាមកណ្ដុរ។ ក្លិនទី៤ គឺផ្កាក្លាំពូ ដែលមានក្លិនខ្លាំង និងហឹរ ហើយអាចធ្វើឱ្យកណ្ដុរមិនសូវចង់នៅក្បែរ។ អាចប្រើប្រេងផ្កាក្លាំពូលើសំឡីដូចគ្នា ប៉ុន្តែគួរដាក់នៅកន្លែងដែលកុមារ និងសត្វចិញ្ចឹមមិនអាចប៉ះបាន។
ក្លិនទី៥ គឺម្ទេសហឹរ។ ប្រភពបានណែនាំថា អាចកាត់ ឬបុកម្ទេស រួចលាយជាមួយទឹក ទុកមួយរយៈ ហើយយកទៅបាញ់តាមកន្លែងដែលកណ្ដុរតែងបង្ហាញខ្លួន។ ប៉ុន្តែម្ទេសអាចធ្វើឱ្យភ្នែក និងច្រមុះរលាក ដូច្នេះត្រូវប្រុងប្រយ័ត្នជាពិសេស ប្រសិនបើនៅក្នុងផ្ទះមានកុមារ ឬសត្វចិញ្ចឹម។
ក្រៅពីប្រើក្លិន គួរ បិទរន្ធ និងចន្លោះដែលកណ្ដុរអាចចូលបាន រក្សាអាហារឱ្យបានជិត និងកុំទុកសំរាមចំហរ។ ការធ្វើបែបនេះអាចជួយកាត់បន្ថយឱកាសដែលកណ្ដុរចូលមកវិញបានច្រើនជាងការពឹងលើក្លិនតែមួយមុខ។ ប្រសិនបើត្រូវប្រើអន្ទាក់ ឬថ្នាំកម្ចាត់កណ្ដុរ គួរដាក់ឱ្យឆ្ងាយពីដៃកុមារ និងសត្វចិញ្ចឹម ដើម្បីជៀសវាងគ្រោះថ្នាក់៕