យោងតាមការចុះផ្សាយពីប្រភពបរទេស អ្នកមានជំងឺហ្គោត អាចដើរ និងធ្វើលំហាត់ប្រាណបាន ប្រសិនបើរាងកាយមានសភាពធម្មតា។ ការដើរជាប្រចាំអាចជួយគ្រប់គ្រងទម្ងន់ ធ្វើឱ្យរាងកាយមានចលនា និងជួយថែសុខភាពទូទៅ។ ប៉ុន្តែការដើរ មិនអាចបញ្ចេញអាស៊ីតអ៊ុយរិកដោយផ្ទាល់ ឬរំលាយកំណកដែលកើតនៅតាមសន្លាក់បានទេ។
មូលហេតុដែលកើតជំងឺហ្គោត គឺដោយសារអាស៊ីតអ៊ុយរិកក្នុងឈាមឡើងខ្ពស់ជាយូរ ហើយអាចបង្កើតជាកំណកនៅតាមសន្លាក់។ ការដើរដោយសមរម្យអាចជួយឱ្យអ្នកប្រើថាមពល និងគ្រប់គ្រងទម្ងន់បានល្អ។ សម្រាប់អ្នកដែលមានទម្ងន់ច្រើន ការសម្រកទម្ងន់បន្តិចម្តងៗ អាចជួយឱ្យកម្រិតអាស៊ីតអ៊ុយរិកប្រសើរឡើង និងអាចជួយបន្ថយការកើតឈឺឡើងវិញ។
ប៉ុន្តែ នៅពេលកំពុងឈឺហ្គោតខ្លាំង មិនគួរបង្ខំខ្លួនដើរ ទេ។ ប្រសិនបើសន្លាក់ហើម ក្តៅ ក្រហម និងឈឺខ្លាំង ជាពិសេសត្រង់ម្រាមជើង កជើង ឬជង្គង់ ការដើរអាចធ្វើឱ្យកន្លែងឈឺទទួលសម្ពាធកាន់តែខ្លាំង។ នៅពេលនេះ គួរសម្រាក និងអនុវត្តតាមការណែនាំរបស់គ្រូពេទ្យសិន។
នៅពេលការហើម ក្តៅ ក្រហម និងការឈឺបានថយចុះ អាចចាប់ផ្តើមដើរយឺតៗប្រហែល ១០–១៥នាទីក្នុងមួយថ្ងៃ ហើយបង្កើនពេលវេលាបន្តិចម្តងៗតាមសមត្ថភាព។ ប្រសិនបើជើងនៅឈឺ ឬខ្សោយ អាចជ្រើសរើសលំហាត់ដែលមិនសូវដាក់សម្ពាធលើសន្លាក់ ដូចជា ជិះកង់នៅនឹងកន្លែង ឬហែលទឹក។
សំខាន់បំផុត គឺ កុំប្រើការដើរជំនួសការព្យាបាលជំងឺហ្គោត។ ទោះបាត់ការឈឺ ក៏មិនមានន័យថាជំងឺបានគ្រប់គ្រងរួចទាំងស្រុងនោះទេ ព្រោះអាស៊ីតអ៊ុយរិកអាចនៅតែខ្ពស់ និងកំណកអាចនៅសល់ក្នុងរាងកាយ។ ដូច្នេះ គួររួមបញ្ចូលការញ៉ាំអាហារឱ្យសមរម្យ គ្រប់គ្រងទម្ងន់ ដើរឬហាត់ប្រាណតាមសមត្ថភាព និងប្រើថ្នាំតាមការណែនាំរបស់គ្រូពេទ្យ៕