យោងតាមការចុះផ្សាយពីប្រភពបរទេស ការជួយខ្លួនឯង គឺជាអាកប្បកិរិយាផ្លូវភេទដែលកើតមានជាទូទៅ ហើយតាមប្រភពបានឱ្យដឹងថា មិនមែនជារឿងខុសប្រក្រតីសម្រាប់មនុស្សភាគច្រើនទេ ប្រសិនបើវាមិនប៉ះពាល់ដល់ការសិក្សា ការងារ ទំនាក់ទំនង ឬជីវិតប្រចាំថ្ងៃ។ វាក៏អាចជួយឱ្យមនុស្សខ្លះមានអារម្មណ៍ធូរស្រាល កាត់បន្ថយភាពតានតឹង និងអាចជួយឱ្យគេងបានស្រួលជាងមុន។
ចំពោះសំណួរថា ជួយខ្លួនឯងរាល់ថ្ងៃមានគ្រោះថ្នាក់ទេ? ប្រភពបានលើកឡើងថា មិនមានចំនួនដងកំណត់ជាក់លាក់សម្រាប់មនុស្សគ្រប់គ្នានោះទេ។ ភាពញឹកញាប់អាស្រ័យលើរបៀបរស់នៅ ស្ថានភាពផ្លូវចិត្ត និងទំនាក់ទំនងរបស់មនុស្សម្នាក់ៗ។ ប្រសិនបើវាមិនធ្វើឱ្យបាត់បង់ការគ្រប់គ្រង និងមិនរំខានដល់ជីវិតប្រចាំថ្ងៃ នោះមិនចាំបាច់ចាត់ទុកថាជាបញ្ហាឡើយ។
ចំណែក ពេលព្រឹក ឬពេលយប់ មួយណាល្អជាង? ប្រភពបានបញ្ជាក់ថា មិនមានពេលណាមួយដែលល្អបំផុតសម្រាប់មនុស្សគ្រប់គ្នាទេ។ នៅពេលព្រឹក មនុស្សខ្លះអាចមានអារម្មណ៍ស្រស់ស្រាយ និងត្រៀមខ្លួនចាប់ផ្តើមថ្ងៃថ្មី។ ចំណែកពេលយប់ ក្រោយពេលឈានដល់ចំណុចកំពូល រាងកាយអាចមានអារម្មណ៍ធូរស្រាល និងស្ងប់ ដែលអាចជួយឱ្យមនុស្សខ្លះងាយគេង។
ក្រៅពីនេះ ប្រភពបានរៀបរាប់ថា ការជួយខ្លួនឯងអាចជួយបន្ធូរភាពតានតឹងក្នុងរាងកាយ និងធ្វើឱ្យអារម្មណ៍ប្រសើរឡើង តាមរយៈការបញ្ចេញសារធាតុមួយចំនួនដែលពាក់ព័ន្ធនឹងការសម្រាក និងអារម្មណ៍រីករាយ។ សម្រាប់ស្ត្រីមួយចំនួន វាក៏អាចជួយបន្ថយការមិនស្រួល ឬការឈឺចាប់ពេលមករដូវបានខ្លះៗ ប៉ុន្តែរាងកាយរបស់មនុស្សម្នាក់ៗមិនដូចគ្នាទេ។
សរុបមក ការជួយខ្លួនឯងមិនមានចំនួនដង ឬពេលវេលាដែលត្រូវអនុវត្តដូចគ្នាសម្រាប់មនុស្សគ្រប់គ្នាទេ។ អ្វីដែលសំខាន់ គឺត្រូវធ្វើក្នុងកម្រិតសមរម្យ និងមិនឱ្យប៉ះពាល់ដល់ការងារ ការសិក្សា ទំនាក់ទំនង ឬជីវិតប្រចាំថ្ងៃ។ ប្រសិនបើមានអារម្មណ៍ថាមិនអាចគ្រប់គ្រងបាន ឬវាចាប់ផ្តើមប៉ះពាល់ដល់ជីវិត និងអារម្មណ៍ គួរពិគ្រោះជាមួយអ្នកជំនាញសុខភាព៕