យោងតាមការចុះផ្សាយពីប្រភពបរទេស ការគេងមិនលក់អាចកើតឡើងដោយសារមូលហេតុជាច្រើន ដូចជា ភាពតានតឹង ការផ្លាស់ប្តូរពេលវេលាគេង ការងារជាវេន ការផឹកកាហ្វេ ឬបរិយាកាសក្នុងបន្ទប់គេងមិនសមស្រប។ ប្រសិនបើកើតឡើងជាញឹកញាប់ វាអាចធ្វើឱ្យថ្ងៃបន្ទាប់អស់កម្លាំង មិនសូវមានស្មារតី និងប៉ះពាល់ដល់ការរស់នៅប្រចាំថ្ងៃ។
វិធីទី១ គឺរៀបចំបន្ទប់គេងឱ្យសមស្រប ដោយកាត់បន្ថយសំឡេងរំខាន បន្ទប់មិនក្តៅ ឬត្រជាក់ពេក និងគួរមានពន្លឺតិច។ វិធីទី២ គឺជៀសវាងភេសជ្ជៈដែលមានកាហ្វេអ៊ីនចាប់ពីពេលរសៀលរហូតដល់មុនចូលគេង។ ប្រភពក៏ណែនាំឱ្យសាកល្បងផឹកទឹកដោះគោក្តៅមួយកែវមុនចូលគេងផងដែរ។
វិធីទី៣ កុំគេងថ្ងៃយូរ ព្រោះអាចធ្វើឱ្យយប់ឡើងកាន់តែពិបាកគេង។ ប្រសិនបើងងុយខ្លាំង អាចសម្រាកខ្លីៗ ប៉ុន្តែប្រភពណែនាំមិនឱ្យគេងថ្ងៃលើស ១ម៉ោង។ វិធីទី៤ គឺគេងឱ្យបានគ្រប់គ្រាន់ និងក្រោយភ្ញាក់គួរងើបចេញពីគ្រែ ហើយទទួលខ្យល់អាកាសពេលព្រឹក។
វិធីទី៥ គឺកំណត់ម៉ោងចូលគេង និងម៉ោងភ្ញាក់ឱ្យបានទៀងទាត់ជារៀងរាល់ថ្ងៃ។ វិធីទី៦ ប្រសិនបើដេកប្រហែល 15–20 នាទីហើយនៅមិនទាន់លក់ គួរងើបចេញពីគ្រែ ហើយទៅធ្វើសកម្មភាពស្ងប់ៗ ដូចជាអានសៀវភៅ ឬស្តាប់តន្ត្រី។ គួរជៀសវាងការមើលទូរទស្សន៍ ឬលេងកុំព្យូទ័រនៅពេលនោះ។
វិធីទី៧ គឺធ្វើលំហាត់ប្រាណជាប្រចាំ ដើម្បីជួយបន្ថយភាពតានតឹង និងធ្វើឱ្យរាងកាយស្រួលសម្រាក។ វិធីទី៨ គឺជៀសវាងការហាត់ប្រាណខ្លាំងនៅពេលយប់ ឬជិតម៉ោងចូលគេង ព្រោះអាចធ្វើឱ្យកាន់តែពិបាកគេង។ ការរក្សាទម្លាប់គេងឱ្យទៀងទាត់ និងរៀបចំបរិយាកាសឱ្យសមស្រប អាចជួយឱ្យការគេងប្រសើរឡើង៕