សមត្ថភាព និងចំណង់ផ្លូវភេទមិនមែនធ្លាក់ចុះដោយសារតែអាយុកើនឡើងតែមួយមុខនោះទេ ប៉ុន្តែវាជារឿយៗបណ្តាលមកពី ទម្លាប់រស់នៅប្រចាំថ្ងៃ ដែលអ្នកមើលរំលង។ ទម្លាប់ទាំងនេះប៉ះពាល់ដោយផ្ទាល់ដល់លំហូរឈាម កម្រិតហ័រម៉ូន និងសុខភាពផ្លូវចិត្ត។
ខាងក្រោមនេះជាទម្លាប់អាក្រក់ទាំង ៤ ដែលកំពុងបំផ្លាញសមត្ថភាពផ្លូវភេទរបស់អ្នកស្ងាត់ៗ៖
១. ការគេងមិនគ្រប់គ្រាន់ (អត់ងងុយរ៉ាំរ៉ៃ)
ការគេងតិចជាង ៦ ម៉ោងក្នុងមួយយប់ ធ្វើឱ្យរាងកាយកាត់បន្ថយការផលិតហ័រម៉ូនភេទ Testosterone (ដែលជាហ័រម៉ូនសំខាន់សម្រាប់ទាំងបុរស និងស្ត្រីក្នុងការភ្ញោចចំណង់ផ្លូវភេទ)។ លើសពីនេះ កង្វះការសម្រាកធ្វើឱ្យរាងកាយល្វើយ អស់កម្លាំង និងគ្មានថាមពលសម្រាប់ការរួមភេទ។
២. ស្ត្រេសរ៉ាំរ៉ៃ និងការគិតច្រើន
នៅពេលអ្នកមានវិបត្តិផ្លូវចិត្ត ស្ត្រេស ឬតានតឹងអារម្មណ៍ខ្លាំង រាងកាយនឹងបញ្ចេញហ័រម៉ូន Cortisol យ៉ាងច្រើន។ ហ័រម៉ូនស្ត្រេសនេះ នឹងទៅទប់ស្កាត់ដំណើរការនៃហ័រម៉ូនភេទ ព្រមទាំងធ្វើឱ្យសរសៃឈាមរួមតូច ដែលជាហេតុធ្វើឱ្យលំហូរឈាមទៅកាន់សរីរាង្គបន្តពូជចុះខ្សោយ និងពិបាកក្នុងការរំញោចអារម្មណ៍។
៣. ការពិសារគ្រឿងស្រវឹង និងបារីច្រើនជ្រុល
បារី៖ សារធាតុញៀន និងជាតិពុលក្នុងបារីបំផ្លាញសរសៃឈាម និងធ្វើឱ្យសរសៃឈាមរឹង បង្កជាឧបសគ្គដល់លំហូរឈាមទៅកាន់សរីរាង្គភេទ (បង្កឱ្យបុរសប្រឈមនឹងបញ្ហាលឹង្គមិនឡើងរឹង)។
គ្រឿងស្រវឹង៖ ទោះបីជាការញ៉ាំបន្តិចបន្តួចជួយឱ្យអារម្មណ៍ធូរស្រាល ប៉ុន្តែការញ៉ាំច្រើនជ្រុលនឹងទៅបង្អាក់ប្រព័ន្ធប្រសាទកណ្តាល ធ្វើឱ្យការបញ្ជូនសញ្ញាអារម្មណ៍យឺតយ៉ាវ និងកាត់បន្ថយសមត្ថភាពផ្លូវភេទ។
៤. ការញ៉ាំអាហារគ្មានសុខភាព (អាហារខ្លាញ់ និងផ្អែមខ្លាំង)
ការញ៉ាំអាហារកែច្នៃ អាហារបំពងមានជាតិខ្លាញ់អាក្រក់ (Trans Fat) និងអាហារផ្អែមខ្លាំង ធ្វើឱ្យកម្រិតកូឡេស្តេរ៉ូលក្នុងឈាមកើនឡើង និងបង្កជាដុំខ្លាញ់កកស្ទះតាមសរសៃឈាម។ នៅពេលសរសៃឈាមរងការកកស្ទះ លំហូរឈាមរត់មិនបានល្អ វានឹងធ្វើឱ្យសមត្ថភាពផ្លូវភេទ និងការឆ្លើយតបនៃរាងកាយធ្លាក់ចុះយ៉ាងលឿន។
+ដំណោះស្រាយដើម្បីស្តារសមត្ថភាពឡើងវិញ៖
សម្រាកឱ្យបានគ្រប់គ្រាន់៖ គេងឱ្យបាន ៧-៨ ម៉ោងក្នុងមួយយប់។
ហាត់ប្រាណទៀងទាត់៖ ការធ្វើលំហាត់ប្រាណជួយបង្កើនលំហូរឈាម និងជួយឱ្យរាងកាយផលិតហ័រម៉ូន Testostorone បានល្អ។
កាត់បន្ថយបារី និងស្រា៖ កែប្រែទម្លាប់រស់នៅឱ្យមានគន្លងសុខភាពល្អ។
គ្រប់គ្រងអារម្មណ៍៖ រកពេលវេលាធូរស្រាលអារម្មណ៍ និងកាត់បន្ថយសម្ពាធការងារ។