មនុស្សជាច្រើនតែងតែរអ៊ូរទាំថា «ញ៉ាំតែបន្តិចសោះក៏ឡើងគីឡូដែរ» ឬ «ញ៉ាំអីក៏ធាត់ដែរ»។ ប៉ុន្តែការឡើងទម្ងន់ មិនមែនកើតឡើងដោយសារតែបរិមាណបាយដែលអ្នកញ៉ាំក្នុងម្ហូបបាយ មួយមុខនោះទេ វាច្រើនតែបណ្តាលមកពី ទម្លាប់តូចៗប្រចាំថ្ងៃ ដែលអ្នកមើលរំលង និងធ្វើដោយមិនដឹងខ្លួន ។
ខាងក្រោមនេះជាទម្លាប់ស្ងាត់ៗទាំង ៥ ដែលលួចបង្កើនគីឡូរបស់អ្នកពីមួយថ្ងៃទៅមួយថ្ងៃ៖
១. ញ៉ាំបណ្តើរ មើលទូរស័ព្ទ ឬទូរទស្សន៍បណ្តើរ
នៅពេលដែលអារម្មណ៍របស់អ្នកផ្តោតលើអេក្រង់ ខួរក្បាលនឹងមិនបានកត់សម្គាល់នូវសញ្ញា «ឆ្អែត» ដែលក្រពះបញ្ជូនទៅនោះទេ ។ លទ្ធផលគឺអ្នកញ៉ាំលើសបរិមាណដែលរាងកាយត្រូវការដោយមិនដឹងខ្លួន និងញ៉ាំលឿនជាងធម្មតា។
២. មើលរំលងកាឡូរីក្នុង «ភេសជ្ជៈ»
មនុស្សភាគច្រើនប្រុងប្រយ័ត្នតែលើម្ហូបអាហារ ប៉ុន្តែភ្លេចគិតពីភេសជ្ជៈដែលញ៉ាំប្រចាំថ្ងៃដូចជា កាហ្វេទឹកដោះគោជូរ តែបៃតងផ្អែម ភេសជ្ជៈប៉ូវកម្លាំង ឬទឹកក្រឡុកផ្សេងៗ។ ភេសជ្ជៈទាំងនេះមានកម្រិតស្ករ និងកាឡូរីខ្ពស់ខ្លាំង ប៉ុន្តែមិនធ្វើឱ្យអ្នកមានអារម្មណ៍ឆ្អែតដូចអាហាររឹងនោះទេ។
៣. ការគេងមិនគ្រប់គ្រាន់ (គេងយប់ជ្រៅ)
ការគេងតិចជាង ៦-៧ ម៉ោងក្នុងមួយយប់ បង្កឱ្យរាងកាយបញ្ចេញហ័រម៉ូន Ghrelin (ហ័រម៉ូនភ្ញោចបំណងប្រាថ្នាចង់ញ៉ាំ) កើនឡើង និងកាត់បន្ថយហ័រម៉ូន Leptin (ហ័រម៉ូនប្រាប់ថារាងកាយឆ្អែត)។ លើសពីនេះ ពេលអ្នកអត់ងងុយ អ្នកតែងតែមាននិន្នាការឃ្លានអាហារដែលមានជាតិស្ករ និងជាតិខ្លាញ់ខ្ពស់នៅពេលយប់។
៤. ញ៉ាំអាហារសម្រន់តូចៗពេញមួយថ្ងៃ
ការញ៉ាំនំស្រួយ ស្ករគ្រាប់ ឬផ្លែឈើក្រៀមបន្តិចបន្តួចនៅជិតតុធ្វើការ អាចមើលទៅដូចជាមិនអី ប៉ុន្តែនៅពេលបូកសរុបកាឡូរីពេញមួយថ្ងៃ វាអាចស្មើនឹងអាហារពេលល្ងាចមួយពេលពេញទៅហើយ។
៥. អង្គុយច្រើនពេក និងកង្វះសកម្មភាពរាងកាយ
ទោះបីជាអ្នកហាត់ប្រាណ ១ ម៉ោងក្នុងមួយថ្ងៃក៏ដោយ ប្រសិនបើ ៧-៨ ម៉ោងដែលនៅសល់អ្នកអង្គុយធ្វើការជាប់រហូតដោយមិនបានក្រោកឈរ ឬដើរបន្តិចបន្តួច ការដុតរំលាយអាហារ (Metabolism) របស់រាងកាយនឹងថយចុះយ៉ាងលឿន ជាហេតុធ្វើឱ្យថាមពលលើសត្រូវរក្សាទុកជាជាតិខ្លាញ់។
+វិធីកែប្រែប្រកបដោយប្រសិទ្ធភាព៖
ចាប់ផ្តើម Eat Mindfully (ញ៉ាំដោយយកចិត្តទុកដាក់) ដោយបិទអេក្រង់ពេលញ៉ាំអាហារ។
ប្តូរមកផឹក ទឹកស ឬតែគ្មានជាតិស្ករជំនួសភេសជ្ជៈផ្អែម។
កំណត់ពេលវេលាគេងឱ្យបានទៀងទាត់ (៧-៨ ម៉ោងក្នុងមួយយប់)។
ក្រោកឈរ និងពត់ពែនខ្លួន ៣០-៦០ នាទីម្តងពេលធ្វើការ។