យោងតាមការចុះផ្សាយពីប្រភពបរទេស ការកក់សក់ជួយសម្អាតញើស ជាតិប្រេង ធូលី និងសំណល់ពីផលិតផលថែសក់។ ប៉ុន្តែការកក់រាល់ថ្ងៃ មិនមែនសុទ្ធតែសមសម្រាប់មនុស្សគ្រប់គ្នាទេ។ អ្នកខ្លះអាចជួបបញ្ហាស្បែកក្បាលស្ងួត រមាស់ ឬសក់ស្ងួតងាយបាក់ ប្រសិនបើកក់ញឹកញាប់ពេក ឬប្រើផលិតផលមិនសមនឹងសក់របស់ខ្លួន។
កំហុសទី១ គឺកក់សក់ញឹកពេកដោយមិនមើលស្ថានភាពសក់។ អ្នកដែលមានសក់ ឬស្បែកក្បាលខ្លាញ់ និងញើសច្រើន អាចត្រូវការកក់ញឹកញាប់ជាងអ្នកដែលមានសក់ស្ងួត។ ប៉ុន្តែបើកក់ញឹកពេក សម្រាប់អ្នកដែលមានស្បែកក្បាលស្ងួត វាអាចធ្វើឱ្យស្បែកក្បាលតឹង ស្ងួត និងរមាស់បាន។
កំហុសទី២ គឺប្រើសាប៊ូមិនសមនឹងសក់ ហើយកំហុសទី៣ គឺកក់ខ្លាំងពេក។ មិនគួរជ្រើសសាប៊ូតែតាមក្លិន ឬបរិមាណពពុះទេ គួរជ្រើសឱ្យសមនឹងស្បែកក្បាល និងប្រភេទសក់។ ពេលកក់ ក៏មិនគួរប្រើក្រចកកេះ ឬខាត់ស្បែកក្បាលខ្លាំងពេក ព្រោះអាចធ្វើឱ្យរងការរំខាន និងមិនស្រួល។
កំហុសទី៤ គឺមិនថែសក់បន្ទាប់ពីកក់ និងមិនលាងទឹកឱ្យស្អាត។ ប្រសិនបើទុកសំណល់សាប៊ូនៅលើសក់ ឬប្រើផលិតផលច្រើនពេក អាចធ្វើឱ្យស្បែកក្បាលមានអារម្មណ៍ធ្ងន់ ឬរំខាន។ សម្រាប់អ្នកដែលមានសក់ស្ងួត ឬធ្លាប់លាបពណ៌ ប៊្លិច ឬកែច្នៃសក់ អាចប្រើក្រែមបន្ទន់សក់នៅផ្នែកកណ្តាលដល់ចុងសក់ ដើម្បីជួយរក្សាសំណើម។
សរុបមក កក់សក់រាល់ថ្ងៃ មិនមែនជារឿងខុសសម្រាប់មនុស្សគ្រប់គ្នាទេ ប៉ុន្តែគួរជ្រើសចំនួនដងឱ្យសមនឹងសក់ និងស្បែកក្បាលរបស់ខ្លួន។ បើស្បែកក្បាលចាប់ផ្តើមស្ងួត រមាស់ ឬសក់កាន់តែស្ងួតបែកងាយ គួរសាកល្បងកាត់បន្ថយការកក់ និងពិនិត្យមើលផលិតផលដែលកំពុងប្រើ។ ការកក់សក់ត្រឹមត្រូវ គឺមិនមែនកក់ឱ្យស្អាតខ្លាំងបំផុតទេ ប៉ុន្តែត្រូវរក្សាតុល្យភាពឱ្យសមរម្យ។