យោងតាមការចុះផ្សាយពីប្រភពបរទេស ការដើរជាវិធីហាត់ប្រាណសាមញ្ញ ដែលអាចជួយឱ្យរាងកាយមានចលនា និងថែសុខភាពបានល្អ។ ប៉ុន្តែប្រសិនបើដើរខុសរបៀប ក៏អាចបង្កឱ្យឈឺក ខ្នង ស្មា ឬជើងបាន។ ដូច្នេះ អ្នកគួរប្រុងប្រយ័ត្នចំពោះ ៥កំហុសដែលមនុស្សជាច្រើនអាចធ្វើពេលដើរ។
កំហុសទី១ គឺដើរដោយកាយវិការមិនត្រឹមត្រូវ ដូចជា ឱនមើលដី ឬមើលទូរស័ព្ទពេលដើរ និងទុកដៃឱ្យនៅស្ងៀម ឬយោលខុសចង្វាក់។ គួរលើកក្បាល មើលទៅមុខ និងឱ្យដៃយោលតាមធម្មជាតិ ដើម្បីជួយរក្សាលំនឹង និងកាត់បន្ថយការតានតឹងនៅក និងខ្នង។
កំហុសទី២ គឺចាប់ផ្តើមដើរច្រើនពេកភ្លាមៗ។ អ្នកដែលទើបចាប់ផ្តើម គួរដើរពីរយៈពេលខ្លី ហើយបន្ថែមចម្ងាយ ឬពេលវេលាបន្តិចម្តងៗ។ ការបង្ខំខ្លួនឱ្យដើរយូរពេក អាចធ្វើឱ្យហត់ និងឈឺសាច់ដុំ រហូតបាត់ចំណាប់អារម្មណ៍ក្នុងការដើរបន្ត។
កំហុសទី៣ គឺយួរកាបូបធ្ងន់ពេក ឬយួរតែម្ខាង។ ទម្ងន់ដែលមិនស្មើគ្នា អាចធ្វើឱ្យស្មា និងខ្នងទទួលសម្ពាធខុសគ្នា។ ប្រសិនបើត្រូវយួរកាបូបពេលដើរ គួរជ្រើសរើសទម្ងន់សមរម្យ និងចែកទម្ងន់ឱ្យស្មើគ្នា។
កំហុសទី៤ គឺបោះជំហានវែងពេក។ ជំហានវែងហួសអាចធ្វើឱ្យជើង និងខ្នងទទួលសម្ពាធច្រើន។ គួរដើរដោយជំហានធម្មតា និងបង្កើនចំនួនជំហានបន្តិចម្តងៗ ប្រសិនបើចង់បង្កើនសកម្មភាព។ កំហុសទី៥ គឺពាក់ស្បែកជើងមិនសម។ ស្បែកជើងសម្រាប់ដើរគួរមានផាសុកភាព ទ្រជើងបានល្អ និងមានស្រទាប់ទន់គ្រប់គ្រាន់ ដើម្បីកាត់បន្ថយការឈឺជើងពេលដើរចម្ងាយឆ្ងាយ។
សរុបមក ការដើរឱ្យមានប្រយោជន៍ មិនមែនគ្រាន់តែដើរឱ្យបានច្រើនទេ ប៉ុន្តែត្រូវ ដើរតាមសមត្ថភាព រក្សាជំហរឱ្យបានល្អ មិនយួររបស់ធ្ងន់ពេក បោះជំហានសមរម្យ និងពាក់ស្បែកជើងត្រឹមត្រូវ។ ចាប់ផ្តើមពីបន្តិច ហើយធ្វើជាប្រចាំ នឹងជួយឱ្យការដើរក្លាយជាទម្លាប់ល្អសម្រាប់សុខភាពរយៈពេលវែង៕