យោងតាមការចុះផ្សាយពីប្រភពបរទេស មនុស្សជាច្រើនគិតថា កក់សក់ ២ដងទើបស្អាតល្អ ប៉ុន្តែជាក់ស្តែង មិនចាំបាច់កក់ ២ដងរាល់ពេលទេ។ សម្រាប់ថ្ងៃធម្មតា ប្រសិនបើសក់មិនសូវកខ្វក់ មិនញើសច្រើន និងមិនបានប្រើផលិតផលដាក់សក់ កក់សាប៊ូតែ ១ដងអាចគ្រប់គ្រាន់។ វាក៏ជួយកាត់បន្ថយការស្ងួតរបស់សក់ និងស្បែកក្បាលផងដែរ។
ប៉ុន្តែបើថ្ងៃណា ញើសច្រើន ធ្វើការក្រៅផ្ទះ ឬប្រើជែល ស្រ្ពេ និងប្រេងដាក់សក់ ការកក់ ២ដងអាចមានប្រយោជន៍ជាង។ ការកក់ដងទី១ អាចជួយលាងធូលី ប្រេង និងផលិតផលដែលជាប់លើសក់ ខណៈដងទី២ ជួយសម្អាតសក់ និងស្បែកក្បាលបានកាន់តែល្អ។
សម្រាប់អ្នកដែលមាន ស្បែកក្បាលស្ងួត ងាយរលាក ឬសក់ស្ងួត ការកក់ ២ដងជាញឹកញាប់អាចមិនសមស្របទេ ព្រោះអាចធ្វើឱ្យស្បែកក្បាលស្ងួត និងសក់ខូចជាងមុន។ ដូច្នេះ មិនមែនកក់កាន់តែច្រើន នឹងស្អាតកាន់តែល្អនោះទេ គឺត្រូវមើលតាមសភាពសក់ និងស្បែកក្បាលរបស់ខ្លួន។
វិធីកក់សក់ក៏សំខាន់មិនចាញ់ចំនួនដងដែរ។ មុនដាក់សាប៊ូ គួរលាងសក់ជាមួយទឹកឱ្យសព្វសិន ហើយប្រើសាប៊ូក្នុងបរិមាណសមរម្យ។ ពេលកក់ គួរម៉ាស្សាស្បែកក្បាលថ្នមៗ ជៀសវាងកោសខ្លាំង ហើយលាងសាប៊ូចេញឱ្យស្អាត ដើម្បីមិនឱ្យមានសំណល់ជាប់លើស្បែកក្បាល។
សរុបមក កក់ ១ដង ឬ ២ដង គួរជ្រើសរើសតាមស្ថានភាពសក់នៅថ្ងៃនោះ។ ថ្ងៃធម្មតា កក់ ១ដងអាចគ្រប់គ្រាន់ ខណៈពេលមានញើសច្រើន ឬប្រើផលិតផលដាក់សក់ច្រើន អាចកក់ ២ដង។ ការកក់សក់ត្រឹមត្រូវ មិនមែនស្ថិតនៅលើការកក់ឱ្យច្រើននោះទេ ប៉ុន្តែស្ថិតនៅលើការរក្សាឱ្យសក់ស្អាត ដោយមិនធ្វើឱ្យស្បែកក្បាលស្ងួតពេក៕