យោងតាមការចុះផ្សាយពីប្រភពបរទេស អ្នកធ្លាប់ឃើញមនុស្សខ្លះដាក់ អំបិល ១–២គ្រាប់ចូលក្នុងកាហ្វេ មុនផឹកដែរឬទេ? វាមិនមែនដើម្បីឱ្យកាហ្វេប្រៃនោះទេ ប៉ុន្តែអំបិលក្នុងបរិមាណតិចបំផុត អាចជួយកាត់បន្ថយអារម្មណ៍ល្វីងរបស់កាហ្វេ ធ្វើឱ្យរសជាតិទន់ និងងាយផឹកជាងមុន។
កាហ្វេអាចមានរសជាតិល្វីងខ្លាំង ដោយសារប្រភេទគ្រាប់កាហ្វេ កម្រិតការឆា ឬវិធីឆុង។ នៅពេលកាហ្វេល្វីង ឬឆ្អើរខ្លាំង អំបិលតិចៗអាចជួយធ្វើឱ្យរសជាតិល្វីងមិនសូវលេចធ្លោ។ ដូច្នេះ អ្នកខ្លះជ្រើសរើសដាក់តែបន្តិចប៉ុណ្ណោះ ជំនួសឱ្យការបន្ថែមស្ករច្រើន។
ប៉ុន្តែការដាក់អំបិលក្នុងកាហ្វេ មិនមែនជាវិធីធ្វើឱ្យកាហ្វេមានប្រយោជន៍ចំពោះសុខភាពជាងមុនទេ។ អ្វីដែលគួរយកចិត្តទុកដាក់ជាងនេះ គឺការបន្ថែមស្ករ ទឹកដោះគោខាប់ ស៊ីរ៉ូ ឬក្រែមច្រើន ព្រោះវាអាចធ្វើឱ្យភេសជ្ជៈមួយកែវមានស្ករ និងថាមពលខ្ពស់ដោយមិនដឹងខ្លួន។
សម្រាប់មនុស្សពេញវ័យដែលមានសុខភាពល្អ ជាតិកាហ្វេអ៊ីនប្រហែល ៤០០មីលីក្រាមក្នុងមួយថ្ងៃ ជាទូទៅមិនបង្កបញ្ហាសម្រាប់មនុស្សភាគច្រើនទេ ប៉ុន្តែមនុស្សម្នាក់ៗមានភាពងាយរងឥទ្ធិពលខុសគ្នា។ ប្រសិនបើផឹកកាហ្វេហើយមានអាការៈញ័រ បេះដូងលោតលឿន មិនសូវគេង ឬឈឺក្បាល គួរកាត់បន្ថយការផឹក។
សរុបមក អំបិល ១–២គ្រាប់ក្នុងកាហ្វេ អាចជួយកែរសជាតិល្វីងបាន ប៉ុន្តែមិនមែនជារូបមន្តសម្ងាត់សម្រាប់សុខភាពល្អទេ។ ប្រសិនបើចូលចិត្តរសជាតិបែបនេះ អាចដាក់តិចៗបាន ប៉ុន្តែអ្វីសំខាន់ជាងគេ គឺផឹកកាហ្វេក្នុងកម្រិតសមរម្យ និងកាត់បន្ថយស្ករ និងគ្រឿងផ្សំផ្អែមៗ៕