យោងតាមការចុះផ្សាយពីប្រភពបរទេស មិនមែនកូនឆ្លាតគឺត្រូវតែចេះអាន ឬចេះគណនាមុនគេទេ។ ពេលខ្លះ សញ្ញានៃការគិតបានល្អអាចបង្ហាញតាមទម្លាប់តូចៗប្រចាំថ្ងៃ ដូចជា ចូលចិត្តសួរ ចាប់អារម្មណ៍លើអ្វីនៅជុំវិញខ្លួន និងចងចាំរឿងតូចៗដែលមនុស្សធំមិនសូវកត់សម្គាល់។ ប្រភពក៏បានលើកឡើងថា កុមារម្នាក់ៗមានចំណុចខ្លាំងខុសគ្នា ដូច្នេះមិនគួរវាស់សមត្ថភាពកូនតាមសញ្ញាមួយចំនួនតែប៉ុណ្ណោះទេ។
សញ្ញាទី១ គឺ កូនសង្កេតឃើញព័ត៌មានតូចៗបានល្អ។ ឧទាហរណ៍ កូនអាចដឹងថាម្តាយប្តូរសក់ ឬចាំថារបស់មួយត្រូវបានផ្លាស់ទីពីកន្លែងដើម។ សញ្ញាទី២ គឺ អាចផ្តោតលើអ្វីដែលខ្លួនចូលចិត្តបានយូរ ដូចជា លេងដុំប្លុក មើលសៀវភៅរូបភាព ឬដោះស្រាយល្បែងដោយខ្លួនឯង។
សញ្ញាទី៣ គឺ ចូលចិត្តសួរ និងចង់ដឹងថា “ហេតុអ្វី?” ទោះធ្វើឱ្យឪពុកម្តាយនឿយហត់ខ្លះក៏ដោយ ការសួរច្រើនអាចបង្ហាញថាកូនកំពុងចង់យល់ពីអ្វីដែលកើតឡើងជុំវិញខ្លួន។ ដូច្នេះ ឪពុកម្តាយគួរលើកទឹកចិត្តឱ្យកូនសួរ និងជួយស្វែងរកចម្លើយជាមួយគ្នា ជាជាងបិទមាត់កូន។
សញ្ញាទី៤ គឺ កូនចេះយល់អារម្មណ៍អ្នកដទៃ ដូចជា ដឹងថាឪពុកម្តាយហត់ ឬចូលទៅលួងមិត្តដែលកំពុងយំ។ សញ្ញាទី៥ គឺ ចូលចិត្តសាកល្បង ដោះរបស់ ប្រមូលផ្តុំរបស់ និងរកវិធីដោះស្រាយដោយខ្លួនឯង។ ការឱ្យកូនមានឱកាសសាកល្បង និងរៀនពីកំហុស អាចជួយឱ្យកូនចេះគិត និងដោះស្រាយបញ្ហាបានកាន់តែប្រសើរ។
សម្រាប់ឪពុកម្តាយ អ្វីដែលសំខាន់មិនមែនជាការបង្ខំឱ្យកូនរៀនមុនអាយុទេ ប៉ុន្តែគឺ បង្កើតឱកាសឱ្យកូនសួរ លេង សាកល្បង និងរៀនពីអ្វីដែលនៅជុំវិញខ្លួន។ ការអានសៀវភៅជាមួយកូន ការនិយាយលេង ការលេងល្បែងគិត និងការឱ្យកូនស្វែងយល់ពីធម្មជាតិ គឺជាវិធីសាមញ្ញដែលអាចជួយគាំទ្រការលូតលាស់របស់កូនបាន៕