យោងតាមការចុះផ្សាយពីប្រភពបរទេស កន្សែងងូតទឹកប៉ះផ្ទាល់នឹងស្បែករាល់ថ្ងៃ ដូច្នេះវាអាចស្រូបយកញើស ខ្លាញ់ កោសិកាស្បែក និងភាពកខ្វក់ផ្សេងៗ។ ប្រសិនបើកន្សែងសើមយូរ ឬមិនបានបោកសម្អាតត្រឹមត្រូវ វាអាចក្លាយជាកន្លែងដែលមេរោគ និងក្លិនមិនល្អកើនឡើង។ ដូច្នេះ ទម្លាប់ប្រើកន្សែងប្រចាំថ្ងៃ គឺជារឿងដែលគួរយកចិត្តទុកដាក់។
១. កុំប្រើកន្សែងរួមគ្នា
សមាជិកគ្រួសារម្នាក់ៗគួរមានកន្សែងផ្ទាល់ខ្លួន។ ការប្រើរួមគ្នាអាចធ្វើឱ្យភាពកខ្វក់ និងបញ្ហាស្បែកផ្ទេរពីម្នាក់ទៅម្នាក់។ ជាពិសេស កុមារ និងអ្នកដែលមានបញ្ហាស្បែក គួរប្រើកន្សែងដាច់ដោយឡែក។
២. កុំទុកកន្សែងសើមយូរ
ក្រោយប្រើរួច គួរអង្រួនកន្សែង ហើយព្យួរនៅកន្លែងមានខ្យល់ចេញចូល ដើម្បីឱ្យស្ងួតបានលឿន។ មិនគួរទុកកន្សែងលើឥដ្ឋ បត់ទុកជាដុំ ឬដាក់ជាន់លើកន្សែងផ្សេងទៀតឡើយ ព្រោះវាធ្វើឱ្យកន្សែងស្ងួតយឺត។
៣. បោកកន្សែងជាប្រចាំ
មិនគួររង់ចាំទាល់តែកន្សែងមានក្លិនទើបបោកទេ ព្រោះកន្សែងអាចកកស្ទះញើស ខ្លាញ់ និងភាពកខ្វក់បាន ទោះមើលទៅនៅស្អាតក៏ដោយ។ គួរបោកតាមការប្រើប្រាស់ ហើយបន្ទាប់ពីបោក ត្រូវធ្វើឱ្យស្ងួតទាំងស្រុងមុនយកមកប្រើម្ដងទៀត។
៤. កុំជូតស្បែកខ្លាំងពេក
ក្រោយងូតទឹក មិនចាំបាច់ដុសស្បែកដោយកន្សែងខ្លាំងៗទេ។ គួរប្រើកន្សែងស្អាត និងទន់ ប៉ះ ឬជូតស្រាលៗ ដើម្បីស្រូបទឹកចេញ។ ការជូតខ្លាំងអាចធ្វើឱ្យស្បែករលាក និងស្ងួត ជាពិសេសអ្នកដែលមានស្បែកងាយប្រតិកម្ម។
៥. ដល់ពេល គួរប្តូរកន្សែងថ្មី
បើកន្សែងចាប់ផ្តើមរឹង ក្តាំង រលាត់រហែក ជក់ទឹកមិនសូវបាន ឬមានក្លិនជាប់រហូត ទោះបានបោកស្អាត ក៏គួរពិចារណាប្តូរថ្មី។ កន្សែងគួររក្សាទុកនៅកន្លែងស្អាត និងស្ងួត ដើម្បីកាត់បន្ថយភាពកខ្វក់ និងក្លិនមិនល្អ។
សរុបមក កន្សែងស្អាតត្រូវស្ងួត ប្រើផ្ទាល់ខ្លួន និងបោកជាប្រចាំ។ ការកែប្រែទម្លាប់តូចៗទាំងនេះ អាចជួយឱ្យការប្រើកន្សែងប្រចាំថ្ងៃមានអនាម័យ និងកាន់តែល្អសម្រាប់សុខភាពស្បែក៕