យោងតាមការចុះផ្សាយពីប្រភពបរទេស គ្រាប់ជី កំពុងពេញនិយមក្នុងចំណោមអ្នកចូលចិត្តថែសុខភាព ព្រោះវាមានជាតិសរសៃច្រើន និងអាចជួយឱ្យឆ្អែតបានយូរ។ វាក៏អាចយកទៅលាយជាមួយទឹក ទឹកដោះគោ ឬយ៉ាអួរ ហើយបន្ថែមក្នុងអាហារពេលព្រឹកបានយ៉ាងងាយស្រួល។
ចំណុចដែលគួរយកចិត្តទុកដាក់គឺ កុំញ៉ាំគ្រាប់ជីទាំងស្ងួតភ្លាមៗ។ ប្រភពបានណែនាំឱ្យលាយជាមួយទឹក ទឹកដោះគោ ឬយ៉ាអួរ រួចទុកប្រហែល ១៥–៣០នាទី ឱ្យគ្រាប់រីក និងទន់សិន មុនពេលញ៉ាំ។ អាចរៀបចំទុកមួយយប់ ដើម្បីងាយញ៉ាំនៅពេលព្រឹកផងដែរ។
វិធីទី២ គឺ កុំញ៉ាំច្រើនពេកក្នុងពេលតែមួយ។ ប្រភពបានណែនាំសម្រាប់មនុស្សពេញវ័យប្រហែល ១ស្លាបព្រាបាយក្នុងមួយថ្ងៃ ឬប្រហែល ១៥ក្រាម។ អ្នកដែលមិនសូវញ៉ាំបន្លែ និងផ្លែឈើ គួរចាប់ផ្តើមពីបរិមាណតិចសិន ហើយបន្ថែមបន្តិចម្តងៗ ដើម្បីឱ្យរាងកាយស៊ាំ។
ក្រៅពីជាតិសរសៃ គ្រាប់ជីក៏មានសារធាតុដែលមានប្រយោជន៍សម្រាប់រាងកាយផងដែរ។ ការញ៉ាំក្នុងបរិមាណសមរម្យ អាចជួយឱ្យមានអារម្មណ៍ឆ្អែត និងជួយដល់ការបន្ទោរបង់។ ដូច្នេះ វាអាចយកទៅបន្ថែមក្នុងអាហារប្រចាំថ្ងៃបាន ដោយមិនចាំបាច់ញ៉ាំច្រើន។
សរុបមក គ្រាប់ជីល្អ តែរបៀបញ៉ាំក៏សំខាន់។ ចាំបាច់ត្រូវទុកឱ្យវារីកមុនញ៉ាំ និងចាប់ផ្តើមពីបរិមាណសមរម្យ ជាពិសេសសម្រាប់អ្នកដែលមិនសូវញ៉ាំអាហារដែលមានជាតិសរសៃ។ ទម្លាប់តូចៗទាំងនេះអាចធ្វើឱ្យការប្រើគ្រាប់ជីក្នុងអាហារប្រចាំថ្ងៃកាន់តែងាយស្រួល និងសមរម្យ៕