ប្រយ័ត្ន! ៧ទម្លាប់ដែលអាចធ្វើឱ្យថ្លើមខូចបន្តិចម្តងៗ

យោងតាមការចុះផ្សាយពីប្រភពបរទេស ថ្លើមជាផ្នែកសំខាន់មួយរបស់រាងកាយ ដែលជួយដំណើរការអាហារ រក្សាទុកថាមពល និងជួយកម្ចាត់សារធាតុដែលមិនល្អចេញពីរាងកាយ។ ប៉ុន្តែទម្លាប់ប្រចាំថ្ងៃមួយចំនួនអាចធ្វើឱ្យថ្លើមរងការខូចខាតបន្តិចម្តងៗ ដោយមិនបង្ហាញរោគសញ្ញាច្បាស់នៅដំណាក់កាលដំបូង។ ទម្លាប់ទាំងនោះរួមមាន ការញ៉ាំអាហារច្រើនហួសកម្រិត ផឹកស្រាច្រើន និងអសកម្មរាងកាយ។

ការញ៉ាំអាហារដែលមានជាតិផ្អែម ខ្លាញ់ និងអាហារចៀនច្រើនពេក អាចធ្វើឱ្យជាតិខ្លាញ់កកកុញនៅក្នុងថ្លើម។ ដើម្បីថែរក្សាថ្លើម គួរញ៉ាំបន្លែ ផ្លែឈើក្នុងបរិមាណសមរម្យ អាហារធ្វើពីគ្រាប់ធញ្ញជាតិ និងប្រភពប្រូតេអ៊ីនដែលមានជាតិខ្លាញ់តិច។ ចំណែកការផឹកស្រាច្រើន ឬជាប្រចាំ ក៏អាចបង្កការខូចខាតថ្លើមយ៉ាងធ្ងន់ធ្ងរ ហើយអ្នកដែលមានបញ្ហាថ្លើម ឬមានជាតិអង់ស៊ីមថ្លើមខ្ពស់ គួរជៀសវាងស្រា។

ការប្រើថ្នាំដោយខ្លួនឯង ការលើសកម្រិតថ្នាំ ឬប្រើថ្នាំជាច្រើនប្រភេទដែលមានសារធាតុដូចគ្នា ក៏អាចប៉ះពាល់ដល់ថ្លើមបានដែរ។ ជាពិសេស ថ្នាំបំបាត់ការឈឺចាប់ និងបន្ថយកម្ដៅមួយចំនួន ប្រសិនបើប្រើលើសកម្រិតអាចបង្កការខូចខាតថ្លើមធ្ងន់ធ្ងរ។ ដូច្នេះ គួរប្រើថ្នាំតាមការណែនាំ និងប្រាប់អ្នកជំនាញសុខភាពអំពីថ្នាំ ឬផលិតផលបំប៉នដែលកំពុងប្រើ។ ក្រៅពីនេះ គួរប្រុងប្រយ័ត្នជំងឺរលាកថ្លើមប្រភេទ B និង C និងជៀសវាងអាហារដែលឡើងផ្សិត ឬមានក្លិននិងពណ៌ខុសប្រក្រតី។

មនុស្សជាច្រើនក៏ងាកទៅរកផលិតផលដែលអះអាងថាអាច “លាងសម្អាតថ្លើម” ប៉ុន្តែមិនមានភស្តុតាងគ្រប់គ្រាន់ថាផលិតផលប្រភេទនេះអាចសម្អាតថ្លើមបានឡើយ។ ផ្ទុយទៅវិញ ផលិតផលរុក្ខជាតិ ឬថ្នាំបំប៉នដែលមិនច្បាស់ប្រភពខ្លះអាចបង្កគ្រោះថ្នាក់ដល់ថ្លើម។ ការមិនសូវធ្វើចលនា និងការចូលគេងយប់ជ្រៅជាប្រចាំក៏មិនល្អចំពោះសុខភាពទូទៅដែរ។ គួរធ្វើលំហាត់ប្រាណកម្រិតមធ្យមយ៉ាងហោចណាស់ប្រហែល ១៥០នាទីក្នុងមួយសប្តាហ៍ និងគេងឱ្យបានគ្រប់គ្រាន់។

ដោយសារថ្លើមអាចមានបញ្ហាដោយមិនបង្ហាញរោគសញ្ញារហូតដល់ស្ថានភាពធ្ងន់ សញ្ញាដូចជា ភ្នែកឬស្បែកលឿង ទឹកនោមពណ៌ខ្មៅ ឈឺឬមិនស្រួលតំបន់ខាងស្តាំផ្នែកខាងលើនៃពោះ ហើមពោះ ឬជើង អស់កម្លាំងជាប់ជាប្រចាំ និងស្រកទម្ងន់ដោយមិនដឹងមូលហេតុ គួរត្រូវបានយកចិត្តទុកដាក់។ អ្នកដែលមានទម្ងន់លើស ជំងឺទឹកនោមផ្អែម ផឹកស្រាច្រើន មានប្រវត្តិជំងឺថ្លើមក្នុងគ្រួសារ ឬមានជំងឺរលាកថ្លើម គួរពិនិត្យសុខភាព និងតាមដានជាមួយអ្នកជំនាញជាប្រចាំ៕