យោងតាមការចុះផ្សាយពីប្រភពបរទេស មនុស្សជាច្រើនមានទម្លាប់យកទូរស័ព្ទចូលបង្គន់ ដើម្បីមើលវីដេអូ ឆែកបណ្ដាញសង្គម ឬលេងហ្គេមពេលបន្ទោបង់។ ប៉ុន្តែទម្លាប់នេះអាចធ្វើឱ្យអង្គុយលើបង្គន់យូរជាងធម្មតា ហើយការអង្គុយយូរអាចបង្កើនសម្ពាធនៅតំបន់រន្ធគូថ និងអាងត្រគាក។
ការអង្គុយលើបង្គន់យូរ ជាពិសេសបើភ្ជាប់ជាមួយការខំរុញខ្លាំង អាចបង្កើនហានិភ័យឫសដូងបាត។ សម្ពាធយូរនៅតំបន់នេះអាចធ្វើឱ្យសរសៃឈាមជុំវិញរន្ធគូថរីក និងហើម បង្កឱ្យមានរោគសញ្ញាដូចជា ឈឺ រមាស់ ឬហូរឈាម។
មិនត្រឹមតែឫសដូងបាតទេ ការអង្គុយយូរអាចពាក់ព័ន្ធនឹងបញ្ហាផ្សេងៗ ដូចជា រន្ធគូថប្រេះ ឬការធ្លាក់រន្ធគូថ ដែលជាស្ថានភាពមិនគួរមើលរំលង។ ការអង្គុយក្នុងទីតាំងដដែលយូរក៏អាចសង្កត់សរសៃប្រសាទ និងសរសៃឈាម បណ្តាលឱ្យជើងស្ពឹក ឬបាត់អារម្មណ៍ជាបណ្តោះអាសន្ន។
ដើម្បីកាត់បន្ថយហានិភ័យ គួរទុកទូរស័ព្ទនៅខាងក្រៅពេលចូលបង្គន់ និងកុំអង្គុយលេងយូរ។ ប្រសិនបើតែងតែចំណាយពេលយូរពេលបន្ទោបង់ គួរទទួលទានអាហារសម្បូរជាតិសរសៃ ដូចជា បន្លែ ផ្លែឈើ និងធញ្ញជាតិ ព្រមទាំងផឹកទឹកឱ្យគ្រប់គ្រាន់ ដើម្បីជួយឱ្យលាមកទន់ និងកាត់បន្ថយការខំរុញ។
សរុបមក ទូរស័ព្ទមិនមែនជាមូលហេតុផ្ទាល់នៃជំងឺទាំងនេះទេ ប៉ុន្តែការយកវាចូលបង្គន់អាចធ្វើឱ្យយើងអង្គុយយូរដោយមិនដឹងខ្លួន។ ដូច្នេះ ការទុកទូរស័ព្ទនៅខាងក្រៅ និងបន្ទោបង់ក្នុងរយៈពេលសមរម្យ គឺជាទម្លាប់ងាយៗដែលអាចជួយថែរក្សាសុខភាពបាន។ ប្រសិនបើមានឈាមចេញតាមរន្ធគូថ ឈឺខ្លាំង ឬមានអាការៈមិនធម្មតាជាបន្តបន្ទាប់ គួរទៅពិនិត្យជាមួយអ្នកជំនាញសុខភាព៕