យោងតាមការចុះផ្សាយពីប្រភពបរទេស ការហាត់កម្លាំង ដូចជាលើកទម្ងន់ មិនត្រឹមជួយបង្កើនសាច់ដុំ និងកម្លាំងរាងកាយប៉ុណ្ណោះទេ ប៉ុន្តែការសិក្សាមួយបានរកឃើញថា បុរសដែលមានម៉ាសសាច់ដុំ និងកម្លាំងសាច់ដុំល្អ មាននិន្នាការមានមុខងារផ្លូវភេទល្អជាង។ ទំនាក់ទំនងនេះត្រូវបានសង្កេតឃើញគួរឱ្យចាប់អារម្មណ៍ជាពិសេសចំពោះបុរសវ័យចំណាស់ និងអ្នកដែលមានកត្តាប្រឈមនឹងបញ្ហាឡើងរឹង ដូចជា ធាត់ និងជំងឺទឹកនោមផ្អែម។
អ្នកស្រាវជ្រាវបានពន្យល់ថា អត្ថប្រយោជន៍សំខាន់មួយអាចពាក់ព័ន្ធនឹងសុខភាពសរសៃឈាម។ ការហាត់កម្លាំងអាចជួយកែលម្អមុខងារស្រទាប់ខាងក្នុងសរសៃឈាម កាត់បន្ថយការរលាក និងជួយឱ្យសរសៃឈាមរីក និងធ្វើឱ្យលំហូរឈាមប្រសើរឡើង។ ការបញ្ចូលឈាមទៅកាន់ប្រដាប់ភេទបានល្អ គឺជាកត្តាសំខាន់មួយសម្រាប់ការឡើងរឹង។
ក្រៅពីនេះ ការមានម៉ាសសាច់ដុំល្អអាចជួយឱ្យរាងកាយប្រើប្រាស់ជាតិស្ករបានមានប្រសិទ្ធភាព និងកែលម្អភាពឆ្លើយតបចំពោះអាំងស៊ុយលីន។ ចំពោះអ្នកដែលមានជំងឺទឹកនោមផ្អែម ឬបញ្ហាមេតាបូលីស ការគ្រប់គ្រងជាតិស្ករមិនបានល្អអាចប៉ះពាល់ដល់សរសៃឈាមតូចៗ និងជាប់ពាក់ព័ន្ធនឹងបញ្ហាមុខងារឡើងរឹង។
ការសិក្សាមុនៗមួយចំនួនបានបង្ហាញថា ការធ្វើសកម្មភាពរាងកាយប្រមាណ ១៦០ នាទីក្នុងមួយសប្តាហ៍ ដែលរួមមានការហាត់កម្លាំង អាចជួយកែលម្អមុខងារឡើងរឹងចំពោះបុរសមួយចំនួន។ ទោះជាយ៉ាងណា មិនទាន់មានរូបមន្តជាក់លាក់ថា ត្រូវលើកទម្ងន់ប៉ុន្មានដង ឬហាត់លំហាត់ណាមួយដែលល្អបំផុតសម្រាប់បញ្ហានេះឡើយ។
សំខាន់បំផុត ការហាត់ប្រាណមិនគួរត្រូវបានចាត់ទុកថា អាចជំនួសថ្នាំ ឬការព្យាបាលវេជ្ជសាស្ត្របានគ្រប់ករណីឡើយ។ ប្រសិនបើបញ្ហាពិបាកឡើងរឹងកើតឡើងជាបន្តបន្ទាប់ អ្នកជំនាញណែនាំឱ្យទៅពិនិត្យ ព្រោះវាអាចពាក់ព័ន្ធនឹងបញ្ហាសរសៃឈាម ជំងឺទឹកនោមផ្អែមប្រភេទទី២ ឬបញ្ហាសុខភាពផ្សេងទៀត។ ការហាត់ប្រាណជាប្រចាំ គួរត្រូវបានចាត់ទុកជាផ្នែកមួយនៃការថែរក្សាសុខភាពទូទៅ និងសុខភាពផ្លូវភេទ៕