យោងតាមការចុះផ្សាយពីប្រភពបរទេស មនុស្សធ្វើការជាច្រើនតែងមានអារម្មណ៍ថា ខួរក្បាលធ្ងន់ គិតមិនសូវចេញ និងងងុយគេងនៅពេលរសៀល ជាពិសេសប្រហែលម៉ោង ២ ដល់ ៣។ អាការៈនេះអាចពាក់ព័ន្ធនឹងចង្វាក់ជីវសាស្ត្រធម្មជាតិរបស់រាងកាយ រួមទាំងភាពនឿយហត់ពីការប្រើភ្នែក និងខួរក្បាលអស់រយៈពេលជាច្រើនម៉ោង។
វិធីងាយមួយគឺ ផឹកទឹកស្អាតមួយកែវ ព្រោះការខ្វះជាតិទឹកអាចធ្វើឱ្យមានអារម្មណ៍នឿយហត់ និងប៉ះពាល់ដល់ការផ្តោតអារម្មណ៍។ ប្រសិនបើត្រូវមើលកុំព្យូទ័រ ឬទូរស័ព្ទយូរ អាចសាកល្បងច្បាប់ 20-20-20 គឺរៀងរាល់ ២០នាទី ងាកមើលអ្វីមួយដែលនៅឆ្ងាយប្រហែល ២០ហ្វីត រយៈពេល ២០វិនាទី ដើម្បីសម្រាកភ្នែក។
បន្ទាប់មក អាច ម៉ាស្សាថ្នមៗនៅចន្លោះចិញ្ចើម រយៈពេល ១–២នាទី និងដកដង្ហើមជ្រៅៗ។ វាអាចជួយឱ្យមានអារម្មណ៍ធូរស្រាល និងស្ងប់ចិត្ត ប៉ុន្តែគួរយល់ថា វិធីនេះមិនមែនជាវិធីព្យាបាលបញ្ហាខួរក្បាល ឬជំងឺណាមួយទេ។
ការអង្គុយនៅទីតាំងដដែលយូរ ក៏អាចធ្វើឱ្យរាងកាយ និងចិត្តមានអារម្មណ៍ស្ពឹកស្រពន់។ ដូច្នេះ គួរ ក្រោកឈរ ដើរបន្តិច បង្វិលស្មា ឬលាតសន្ធឹងដៃជើង ប្រហែលមួយនាទី ដើម្បីបំបែកភាពនឿយហត់ពីការអង្គុយយូរ។ អាចបន្ថែមការស្រូបក្លិនស្រស់ៗ ដូចជា ជីរអង្កាមឬក្រូចឆ្មារ ប្រសិនបើក្លិនទាំងនេះធ្វើឱ្យខ្លួនមានអារម្មណ៍ស្រស់ស្រាយ។
សរុបមក នៅពេលខួរក្បាលចាប់ផ្តើមធ្ងន់ និងងងុយនៅពេលរសៀល មិនចាំបាច់ប្រញាប់ផឹកកាហ្វេមួយកែវទៀតទេ។ អាចចំណាយពេលត្រឹមប្រហែល ៥នាទី ដើម្បី ផឹកទឹក សម្រាកភ្នែក ម៉ាស្សាថ្នមៗ លាតសន្ធឹងរាងកាយ និងប្រើក្លិនស្រស់ស្រាយ។ ទោះជាយ៉ាងណា ប្រសិនបើអស់កម្លាំង ឬងងុយខ្លាំងជាប្រចាំ គួរពិនិត្យមើលគុណភាពការគេង និងសុខភាពទូទៅផងដែរ៕