យោងតាមការចុះផ្សាយពីប្រភពបរទេស ការគេងមិនលក់អាចកើតឡើងដោយសារភាពតានតឹង ការព្រួយបារម្ភ ការផ្លាស់ប្តូរម៉ោងគេង ការផឹកកាហ្វេ ឬតែពេលរសៀល និងការប្រើទូរស័ព្ទមុនចូលគេង។ ប្រសិនបើកើតឡើងញឹកញាប់ វាអាចធ្វើឱ្យអស់កម្លាំង ខ្វះការផ្តោតអារម្មណ៍ និងប៉ះពាល់ដល់ការរស់នៅប្រចាំថ្ងៃ។
ដើម្បីជួយឱ្យគេងបានស្រួលជាងមុន គួររៀបចំបន្ទប់គេងឱ្យស្ងាត់ ងងឹត និងមានសីតុណ្ហភាពសមរម្យ ព្រមទាំងកាត់បន្ថយកាហ្វេ តែ ភេសជ្ជៈប៉ូវកម្លាំង និងភេសជ្ជៈមានជាតិកាហ្វេអ៊ីននៅពេលរសៀល ឬមុនចូលគេង។ ការផឹកទឹកដោះគោក្តៅមួយកែវក៏អាចជួយឱ្យមនុស្សមួយចំនួនមានអារម្មណ៍ធូរស្រាលមុនចូលគេង ប៉ុន្តែមិនមែនជាវិធីដែលមានប្រសិទ្ធភាពសម្រាប់គ្រប់គ្នានោះទេ។
គួរព្យាយាម ចូលគេង និងភ្ញាក់នៅម៉ោងដដែលជាប្រចាំ រួមទាំងថ្ងៃឈប់សម្រាក។ ប្រសិនបើត្រូវការគេងថ្ងៃ គួរកំណត់រយៈពេលឱ្យខ្លីប្រហែល ២០–៣០នាទី។ ចំណែកការហាត់ប្រាណជាប្រចាំ អាចជួយបន្ថយភាពតានតឹង និងគាំទ្រគុណភាពការគេង ប៉ុន្តែគួរជៀសវាងការហាត់ខ្លាំងនៅជិតម៉ោងចូលគេង។
ប្រសិនបើដេកលើគ្រែហើយ ប្រហែល ២០នាទីនៅតែមិនងងុយ អាចក្រោកឡើងធ្វើសកម្មភាពស្ងប់ៗ ដូចជាអានសៀវភៅ ស្តាប់តន្ត្រីស្រាល ឬធ្វើសមាធិ ហើយចូលគេងវិញនៅពេលចាប់ផ្តើមងងុយ។ មុនចូលគេង គួរកាត់បន្ថយការមើលទូរស័ព្ទ ឬអេក្រង់ និងអាចប្រើការដកដង្ហើមជ្រៅៗ ដើម្បីជួយឱ្យរាងកាយសម្រាក។
ការគេងមិនលក់រយៈពេលខ្លីអាចកើតមានចំពោះមនុស្សជាច្រើន ប៉ុន្តែប្រសិនបើបញ្ហានេះកើតឡើង យ៉ាងហោចណាស់ ៣យប់ក្នុងមួយសប្តាហ៍ និងបន្តលើស ៣ខែ ឬប៉ះពាល់ខ្លាំងដល់ការងារ និងជីវិតប្រចាំថ្ងៃ គួរពិគ្រោះជាមួយគ្រូពេទ្យ ដើម្បីស្វែងរកមូលហេតុ និងទទួលការព្យាបាលដែលសមស្រប។ មិនគួរប្រើថ្នាំងងុយគេងដោយខ្លួនឯងឡើយ៕