យោងតាមការចុះផ្សាយពីប្រភពបរទេស ស៊ុតដែលចម្អិនរួច និងម្ហូបដែលមានស៊ុតផ្សំ អាចយកមកកម្ដៅម្ដងទៀតបាន ប្រសិនបើរក្សាទុកបានត្រឹមត្រូវ។ បន្ទាប់ពីចម្អិន គួរដាក់ក្នុងធុងរាបស្មើ ដើម្បីឱ្យត្រជាក់លឿន ហើយរក្សាទុកក្នុងទូទឹកកកនៅសីតុណ្ហភាព ៤°C ឬទាបជាងនេះ និងគួរបរិភោគក្នុងរយៈពេល ៣–៤ថ្ងៃ។
នៅពេលកម្ដៅឡើងវិញ ស៊ុត ឬម្ហូបដែលមានស៊ុត គួរត្រូវបានកម្ដៅឱ្យដល់សីតុណ្ហភាពខាងក្នុងប្រហែល ៧៤°C ដើម្បីជួយកាត់បន្ថយហានិភ័យពីបាក់តេរីបង្កជំងឺ។ ស៊ុតក៏គួរចម្អិនឱ្យឆ្អិនល្អតាំងពីដំបូងផងដែរ។
វិធីកម្ដៅអាចខុសគ្នាតាមប្រភេទស៊ុត។ ស៊ុតច្របល់អាចកម្ដៅក្នុងមីក្រូវ៉េវរយៈពេលខ្លីៗ ២០–៣០វិនាទី ហើយកូរឱ្យសព្វ។ ស៊ុត អាចកម្ដៅក្នុងឡកម្ដៅនៅប្រហែល ១៧៦°C។ ស៊ុតចៀនអាចកម្ដៅលើខ្ទះ ឬក្នុងទឹកក្តៅដោយប្រើពេលខ្លី។
ចំពោះស៊ុតស្ងោរ មិនគួរដាក់ចូលមីក្រូវ៉េវទាំងមូលទេ ព្រោះសម្ពាធអាចកើនឡើងខាងក្នុង និងធ្វើឱ្យស៊ុតផ្ទុះ។ ជំនួសមកវិញ អាចដាក់ស៊ុតក្នុងចានដែលធន់នឹងកម្ដៅ រួចចាក់ទឹកក្តៅគ្រប និងទុកប្រហែល ១០នាទី។
ការកម្ដៅស៊ុតម្ដងទៀត ជាទូទៅអាចធ្វើបានដោយសុវត្ថិភាព ប្រសិនបើរក្សាទុកត្រឹមត្រូវ និងកម្ដៅឱ្យបានគ្រប់។ ប៉ុន្តែការកម្ដៅយូរពេកអាចធ្វើឱ្យស៊ុតស្ងួត រឹង ឬមានសភាពដូចកៅស៊ូ ហើយអាចប៉ះពាល់ដល់រសជាតិ និងវាយនភាព។ ការស្រាវជ្រាវអំពីការផ្លាស់ប្តូរតម្លៃសារធាតុចិញ្ចឹមពីការកម្ដៅស៊ុតដែលចម្អិនរួច នៅមិនទាន់មានច្រើននៅឡើយ៕