យោងតាមការចុះផ្សាយពីប្រភពបរទេស មនុស្សជាច្រើនមានទម្លាប់លាងសាច់មាន់ឆៅមុនចម្អិន ដោយគិតថានឹងជួយសម្អាតមេរោគ និងធ្វើឱ្យសាច់មាន់ស្អាតជាងមុន។ ប៉ុន្តែសម្រាប់សាច់មាន់ដែលបានរៀបចំ និងវេចខ្ចប់តាមអនាម័យត្រឹមត្រូវ ការលាងមុនចម្អិនមិនមែនជារឿងចាំបាច់ឡើយ។
ផ្ទុយទៅវិញ ការលាងសាច់មាន់ឆៅអាចធ្វើឱ្យដំណក់ទឹកបែកខ្ទាតទៅលើអាងលាងចាន ផ្ទៃផ្ទះបាយ ឧបករណ៍ និងអាហារផ្សេងៗ។ ដំណក់ទឹកទាំងនេះអាចនាំបាក់តេរីទៅកន្លែងផ្សេងៗ និងបង្កការបំពុលឆ្លងដោយមិនដឹងខ្លួន។
អ្វីដែលសំខាន់ជាងការលាង គឺការចម្អិនសាច់មាន់ឱ្យឆ្អិនល្អ។ តាមអត្ថបទ សាច់មាន់គួរត្រូវបានចម្អិនឱ្យមានសីតុណ្ហភាពខាងក្នុងយ៉ាងហោចណាស់ ៧៥ អង្សាសេ ដើម្បីកាត់បន្ថយហានិភ័យពីមេរោគដែលអាចមាននៅក្នុងសាច់ឆៅ។
ទោះជាយ៉ាងណា ប្រសិនបើសាច់មាន់ទិញពីទីផ្សារស្រស់ ហើយមានកខ្វក់ជាក់ស្តែង ដូចជា រោម ដី ឬកាកសំណល់ពីការកាប់សាច់ ការលាងអាចធ្វើបាន ប៉ុន្តែគួរប្រុងប្រយ័ត្នខ្ពស់ ដើម្បីកុំឱ្យទឹកបែកខ្ទាតទៅកន្លែងផ្សេងៗក្នុងផ្ទះបាយ។
ក្រោយពេលប៉ះសាច់មាន់ឆៅ គួរលាងដៃឱ្យបានស្អាត និងសម្អាតអាងលាងចាន ផ្ទៃតុ កាំបិត និងឧបករណ៍ផ្សេងៗដែលបានប៉ះសាច់ភ្លាមៗ។ ដូច្នេះ សម្រាប់សាច់មាន់ដែលស្អាត និងបានរៀបចំតាមអនាម័យ មិនចាំបាច់លាងមុនចម្អិនទេ ដោយគួរផ្តោតសំខាន់លើការចម្អិនឱ្យឆ្អិនល្អ និងរក្សាអនាម័យក្នុងផ្ទះបាយជាចម្បង៕