យោងតាមការចុះផ្សាយពីប្រភពបរទេស មនុស្សជាច្រើនតែងតែត្រូវបានប្រាប់តាំងពីកុមារភាពថា កុំញ៉ាំគ្រាប់ត្របែក ព្រោះអាចធ្វើឱ្យរលាកខ្នែងពោះវៀន។ ប៉ុន្តែតាមព័ត៌មានក្នុងអត្ថបទនេះ ការញ៉ាំត្របែក រួមទាំងគ្រាប់របស់វា មិនមែនជាមូលហេតុដោយផ្ទាល់នៃការរលាកខ្នែងពោះវៀនទេ ហើយករណីគ្រាប់ត្របែកចូលទៅស្ទះខ្នែងពោះវៀនត្រូវបានចាត់ទុកថាកម្រណាស់។
នៅពេលលេបគ្រាប់ត្របែកចូលទៅក្នុងរាងកាយ គ្រាប់ដែលរឹងមិនងាយត្រូវបានរំលាយទេ ប៉ុន្តែជាទូទៅវាឆ្លងកាត់ប្រព័ន្ធរំលាយអាហារ និងត្រូវបានបញ្ចេញតាមលាមក។ ការរលាកខ្នែងពោះវៀនភាគច្រើនពាក់ព័ន្ធនឹងការស្ទះនៅច្រកខ្នែងពោះវៀន ដែលអាចបណ្តាលឱ្យមានការរីកធំ និងការឆ្លងមេរោគ។
ផ្ទុយទៅវិញ ត្របែកជាផ្លែឈើដែលមានវីតាមីន C និងជាតិសរសៃខ្ពស់។ ការទទួលទានជាប្រចាំអាចជួយផ្តល់សារធាតុចិញ្ចឹម ជួយឱ្យឆ្អែតបានយូរ និងគាំទ្រដល់ការបន្ទោរបង់បានល្អ។
ទោះជាយ៉ាងណា អ្នកដែលមានប្រព័ន្ធរំលាយអាហារមិនសូវល្អ ឬមិនទំពារអាហារឱ្យម៉ត់ គួរប្រុងប្រយ័ត្នចំពោះការញ៉ាំគ្រាប់ត្របែកក្នុងបរិមាណច្រើនក្នុងពេលតែមួយ ព្រោះអាចធ្វើឱ្យហើមពោះ ពោះពេញ ឬទល់លាមកបាន។
សរុបមក ការញ៉ាំគ្រាប់ត្របែកមិនមានន័យថានឹងធ្វើឱ្យរលាកខ្នែងពោះវៀននោះទេ។ ដូច្នេះ មិនចាំបាច់ភ័យខ្លាចគ្រាប់ត្របែកពេកឡើយ ប៉ុន្តែគួរញ៉ាំក្នុងបរិមាណសមរម្យ និងទំពារឱ្យបានល្អ៕