​ស្នាមជាំកើតឡើងដោយមិនដឹងមូលហេតុ? កុំមើលរំលង សញ្ញាដែលគួរប្រុងប្រយ័ត្ន​

យោងតាមការចុះផ្សាយពីប្រភពបរទេស ស្នាមជាំលើស្បែកភាគច្រើនកើតឡើងបន្ទាប់ពីប៉ះទង្គិច ឬរបួសតូចៗ ប៉ុន្តែប្រសិនបើស្នាមជាំកើតឡើងញឹកញាប់ដោយមិនដឹងមូលហេតុ ឬមិនបាត់ទៅតាមធម្មតា គួរយកចិត្តទុកដាក់ ព្រោះវាអាចពាក់ព័ន្ធនឹងបញ្ហាសុខភាពមួយចំនួន។

ស្នាមជាំដែលកើតឡើងងាយ និងញឹកញាប់ អាចពាក់ព័ន្ធនឹងបញ្ហាការកកឈាម ដូចជា ជំងឺហេម៉ូហ្វីលា (Hemophilia) ដែលធ្វើឱ្យឈាមកកយឺត។ ក្នុងករណីខ្លះ ការថយចុះចំនួនប្លាកែត ឬបញ្ហាខួរឆ្អឹង ក៏អាចធ្វើឱ្យងាយមានស្នាមជាំ និងហូរឈាមបានផងដែរ។

ប្រសិនបើស្នាមជាំកើតឡើងដោយគ្មានការប៉ះទង្គិច ហើយមានរោគសញ្ញាដូចជា អស់កម្លាំងខុសធម្មតា ស្លេកស្លាំង ក្តៅខ្លួន ឬមានស្នាមជាំជាច្រើនកន្លែង គួរទៅពិនិត្យជាមួយគ្រូពេទ្យ ដើម្បីស្វែងរកមូលហេតុឱ្យបានច្បាស់។

ជាពិសេស ប្រសិនបើមានស្នាមជាំជាមួយការហើម ឈឺ ឬឈឺចាប់នៅតំបន់ជើង ឬមានការហូរឈាមខុសធម្មតា ក៏មិនគួរមើលរំលងឡើយ ព្រោះរោគសញ្ញាទាំងនេះអាចមានមូលហេតុជាច្រើន និងត្រូវការការវាយតម្លៃពីអ្នកជំនាញ។

សរុបមក ស្នាមជាំមួយកន្លែងមិនមានន័យថាជាជំងឺធ្ងន់នោះទេ ប៉ុន្តែ ស្នាមជាំដែលកើតឡើងញឹកញាប់ដោយមិនដឹងមូលហេតុ មិនបាត់ក្នុងរយៈពេលយូរ ឬមានរោគសញ្ញាផ្សេងទៀតរួមជាមួយ គួរទៅពិគ្រោះជាមួយគ្រូពេទ្យ ដើម្បីពិនិត្យឈាម និងរកមូលហេតុពិតប្រាកដ៕