មនុស្សជាច្រើនតែងជួបប្រទះបញ្ហាឈឺក្បាលម្ខាងៗ ហើយភាគច្រើនតែងគិតថាវាគ្រាន់តែជាការឈឺក្បាលប្រកាំង (Migraine) ភាពតានតឹងក្នុងអារម្មណ៍ ឬការគេងមិនគ្រប់គ្រាន់។ ការសន្មតដោយខ្លួនឯងបែបនេះ ជារឿយៗនាំឱ្យមានការមើលរំលងសញ្ញាព្រមានសំខាន់ៗមួយចំនួន ដែលរាងកាយព្យាយាមប្រាប់ពីបញ្ហាធ្ងន់ធ្ងរ ជាពិសេសគឺជំងឺដុំសាច់ក្នុងខួរក្បាល។
ការឈឺក្បាលដោយសារស្រ្តេស និងប្រកាំង (ទូទៅ)
ការឈឺក្បាលប្រភេទនេះ ច្រើនតែទាក់ទងនឹងរបៀបរស់នៅប្រចាំថ្ងៃ និងមានលក្ខណៈដូចខាងក្រោម៖
ការឈឺក្បាលដោយស្រ្តេស (Tension Headache)៖ មានអារម្មណ៍ដូចជាមានខ្សែរឹតជុំវិញក្បាល ឬតឹងណែននៅផ្នែកខាងក្រោយកញ្ចឹងក និងសៀតផ្កា តែមិនធ្វើឱ្យក្អួតចង្អោរនោះឡើយ។
ការឈឺក្បាលប្រកាំង (Migraine)៖ ឈឺចុកខ្ទោកៗនៅផ្នែកម្ខាងនៃក្បាល ជារឿយៗមកជាមួយអាការចាញ់ពន្លឺ ចាញ់សំឡេងខ្លាំង ឬមានអារម្មណ៍ចង់ក្អួត។ ការឈឺក្បាលនេះច្រើនធូរស្រាលក្រោយពេលសម្រាកនៅកន្លែងស្ងាត់ ឬគេងបានគ្រប់គ្រាន់។
+សញ្ញាព្រមានដែលគួរឱ្យសង្ស័យពីដុំសាច់ក្នុងខួរក្បាល
ដុំសាច់ក្នុងខួរក្បាលបង្កឱ្យមានការកើនឡើងនូវសម្ពាធក្នុងលលាដ៍ក្បាល (Intracranial Pressure) ដែលបង្ហាញអាការឈឺក្បាលប្លែកពីធម្មតា៖
ឈឺខ្លាំងពេលព្រឹកព្រលឹម៖ ភ្ញាក់ពីគេងភ្លាមឈឺក្បាលខ្លាំង ហើយអាការកាន់តែធ្ងន់ធ្ងរនៅពេលក្អក កណ្តាស់ ឬឱនក្បាលចុះក្រោម។
ក្អួតចង្អោរភ្លាមៗ៖ ឧស្សាហ៍ក្អួតនៅពេលព្រឹកដោយគ្មានបញ្ហាទាក់ទងនឹងក្រពះពោះវៀនឡើយ។
ការប្រែប្រួលគំហើញ និងអារម្មណ៍៖ ភ្នែកស្រវាំង មើលឃើញរូបភាពបែកជាពីរ ពិបាករក្សាលំនឹងខ្លួន ឬមានអាការស្ពឹក/ខ្សោយដៃជើងមួយចំហៀង។
ការប្រែប្រួលអត្តចរិត និងការចងចាំ៖ ឆាប់ភ្លេចភ្លាំង ពិបាកនិយាយរកនឹកពាក្យមិនឃើញ ឬមានការផ្លាស់ប្តូរអារម្មណ៍ខុសពីធម្មតា។
ការប្រកាច់៖ កើតឡើងភ្លាមៗចំពោះមនុស្សពេញវ័យដែលមិនធ្លាប់មានប្រវត្តិជំងឺប្រកាច់ពីមុនមក។
+ពេលណាដែលត្រូវជួបវេជ្ជបណ្ឌិតជាបន្ទាន់?
ប្រសិនបើការឈឺក្បាលរបស់អ្នកកាន់តែវិវត្តខ្លាំងឡើងៗជាលំដាប់ មិនបាត់ទៅវិញទោះបីបានលេបថ្នាំបំបាត់ការឈឺចាប់ ឬមានរោគសញ្ញារួមផ្សំដូចជាស្រវាំងភ្នែក និងខ្សោយអវយវៈ សូមកុំបង្អង់យូរ។ ការជួបពិគ្រោះជាមួយគ្រូពេទ្យឯកទេសប្រព័ន្ធប្រសាទ ដើម្បីធ្វើការស្កេនខួរក្បាល (CT Scan ឬ MRI) គឺជាមធ្យោបាយច្បាស់លាស់តែមួយគត់ក្នុងការកំណត់មូលហេតុពិតប្រាកដ និងជួយសង្គ្រោះអាយុជីវិតបានទាន់ពេលវេលា។