យោងតាមការចុះផ្សាយពីប្រភពបរទេស សក់ស្កូវកើតឡើងនៅពេលកោសិកានៅឫសសក់ដែលបង្កើតសារធាតុពណ៌ចាប់ផ្តើមធ្វើការថយចុះ។ កត្តាសំខាន់ៗរួមមាន អាយុ តំណពូជ ភាពតានតឹង របៀបរស់នៅ និងបញ្ហាសុខភាពមួយចំនួន។ ដូច្នេះ មនុស្សខ្លះអាចចាប់ផ្តើមមានសក់ស្កូវតាំងពីវ័យក្មេង។
សម្រាប់សំណួរថា សក់ស្កូវអាចខ្មៅវិញបានឬទេ? ចម្លើយគឺ អាចមានក្នុងករណីខ្លះ។ ប្រសិនបើសក់ស្កូវពាក់ព័ន្ធនឹងកត្តាដែលអាចកែសម្រួលបាន ដូចជា កង្វះវីតាមីន B12 អាស៊ីតហ្វូលិក ជាតិដែក ឬបញ្ហាក្រពេញទីរ៉ូអ៊ីត ការព្យាបាលមូលហេតុអាចជួយឱ្យសារធាតុពណ៌របស់សក់មនុស្សមួយចំនួនប្រសើរឡើងវិញ។
ប៉ុន្តែ ប្រសិនបើសក់ស្កូវបណ្តាលមកពីអាយុ ឬតំណពូជ ការឱ្យសក់ខ្មៅវិញដោយធម្មជាតិមិនមែនជារឿងដែលកើតឡើងជាទូទៅទេ។ ចំណែកការញ៉ាំល្ងខ្មៅ សណ្តែកខ្មៅ ឬអាហារពណ៌ខ្មៅផ្សេងៗ ក៏មិនទាន់មានភស្តុតាងគ្រប់គ្រាន់ថា អាចធ្វើឱ្យសក់ស្កូវខ្មៅវិញបានដែរ។
ប្រសិនបើសក់ស្កូវកើនឡើងយ៉ាងឆាប់រហ័សខុសធម្មតា ហើយមានរោគសញ្ញាដូចជា សក់ជ្រុះ អស់កម្លាំង ឬស្រកទម្ងន់ខ្លាំង គួរពិគ្រោះជាមួយគ្រូពេទ្យ ដើម្បីពិនិត្យរកមូលហេតុដែលអាចពាក់ព័ន្ធនឹងសុខភាព។
សម្រាប់អ្នកដែលចង់បិទសក់ស្កូវ អាចជ្រើសរើស ពណ៌ត្នោតធម្មជាតិ ឬត្នោតចាស់ ដើម្បីឱ្យសក់ថ្មីដុះឡើងមិនសូវឃើញភាពខុសគ្នាខ្លាំង។ ប្រសិនបើសក់ស្កូវមានតិច អាចប្រើបច្ចេកទេស Highlight ឬ Grey Blending ដើម្បីឱ្យសក់ស្កូវចូលគ្នាជាមួយពណ៌សក់ទាំងមូល៕