យោងតាមការចុះផ្សាយពីប្រភពបរទេស ជំងឺតម្រងនោមរ៉ាំរ៉ៃនៅដំណាក់កាលដំបូង ជាញឹកញាប់មិនបង្ហាញរោគសញ្ញាច្បាស់ឡើយ ហើយមិនមែនតែងតែបណ្តាលឱ្យឈឺចង្កេះ ឬឈឺខ្នងទេ។ នៅពេលមុខងារតម្រងនោមមានបញ្ហា រាងកាយអាចបង្ហាញសញ្ញាមួយចំនួនតាមរយៈជើង និងប្រអប់ជើង។
សញ្ញាដែលគួរយកចិត្តទុកដាក់រួមមាន ជើង ឬកជើងហើម និងមានស្នាមស្រោមជើងជ្រៅ ដែលអាចពាក់ព័ន្ធនឹងការកកស្ទះជាតិទឹក។ បន្ទាប់មកគឺ កំភួនជើងរមួលក្រពើញឹកញាប់ ជាពិសេសពេលយប់ ដែលអាចពាក់ព័ន្ធនឹងការប្រែប្រួលនៃទឹក និងជាតិរ៉ែក្នុងរាងកាយ។
សញ្ញាទី៣ គឺ ជើងស្ពឹក រមាស់ ឬមានអារម្មណ៍ដូចមានសត្វលូនលើស្បែក។ សញ្ញាទី៤ គឺ ស្បែកជើងស្ងួត និងរមាស់ជាប់រហូត ហើយសញ្ញាទី៥ គឺ ប្រអប់ជើងត្រជាក់ ស្ពឹក ឬរបួសជាសះស្បើយយឺត។ ទោះជាយ៉ាងណា រោគសញ្ញាទាំងនេះមិនមែនសុទ្ធតែបណ្តាលមកពីតម្រងនោមទេ ហើយអាចពាក់ព័ន្ធនឹងជំងឺទឹកនោមផ្អែម បញ្ហាប្រព័ន្ធឈាមរត់ ឬបញ្ហាសុខភាពផ្សេងៗ។
ប្រសិនបើមានជើងហើមជាញឹកញាប់ ជាពិសេសរួមជាមួយ ទឹកនោមពពុះខុសធម្មតា អស់កម្លាំង ឬសម្ពាធឈាមពិបាកគ្រប់គ្រង គួរទៅពិនិត្យសុខភាព។ ការពិនិត្យឈាម និងទឹកនោមនិងការពិនិត្យប្រូតេអ៊ីនក្នុងទឹកនោម អាចជួយវាយតម្លៃមុខងារតម្រងនោមបាន។
សូមចងចាំថា ការមានសញ្ញាណាមួយនៅជើង មិនអាចបញ្ជាក់ថាមានជំងឺតម្រងនោមបានដោយខ្លួនឯងឡើយ។ អ្នកដែលមានជំងឺទឹកនោមផ្អែម សម្ពាធឈាមខ្ពស់ ឬជំងឺបេះដូង គួរត្រួតពិនិត្យមុខងារតម្រងនោមជាប្រចាំ ទោះបីមិនទាន់មានរោគសញ្ញាក៏ដោយ៕