ញ៉ាំទឹកក្រូចឆ្មារ បន្ថែមអ្វីល្អ? ៦មុខជួយឱ្យស្រស់ស្រាយ និងបង្កើនអត្ថប្រយោជន៍

យោងតាមការចុះផ្សាយពីប្រភពបរទេស ទឹកក្រូចឆ្មារ ជាភេសជ្ជៈងាយធ្វើ មានរសជាតិជូរស្រស់ស្រាយ និងអាចជួយឱ្យមនុស្សដែលមិនសូវចូលចិត្តផឹកទឹកសាប ផឹកទឹកបានច្រើនជាងមុន។ ក្រូចឆ្មារក៏មានវីតាមីន C ដែលចូលរួមក្នុងការបង្កើតកូឡាជែន ជួយការពារកោសិកាពីអុកស៊ីតកម្ម និងជួយឱ្យរាងកាយស្រូបយកជាតិដែកពីអាហាររុក្ខជាតិបានល្អជាងមុន។

ប្រសិនបើចង់បង្កើនរសជាតិ និងសារធាតុចិញ្ចឹម អាចបន្ថែម គ្រាប់ជី ដែលសម្បូរជាតិសរសៃ ប្រូតេអ៊ីន និងខ្លាញ់មិនឆ្អែត។ គួរត្រាំគ្រាប់ជីឱ្យរីកមុនផឹក ហើយចាប់ផ្តើមពីបរិមាណតិច ដើម្បីជៀសវាងអាការៈហើមពោះ ឬមិនស្រួលពោះ។

ខ្ញីស្រស់ ក៏ជាជម្រើសល្អសម្រាប់បន្ថែមក្លិនក្រអូប និងរសជាតិហឹរបន្តិច។ ខ្ញីត្រូវបានសិក្សាថាអាចជួយបន្ថយការចង្អោរ និងក្អួតក្នុងស្ថានភាពមួយចំនួន។ ចំណែក ផ្លែឈើស្រស់ ដូចជា ស្ត្របឺរី ប៊្លូបឺរី ឬក្រូច អាចជួយបន្ថែមរសជាតិ និងសារធាតុចិញ្ចឹម ដោយមិនចាំបាច់បន្ថែមស៊ីរ៉ូផ្អែម។

សម្រាប់អ្នកចង់បានភេសជ្ជៈកាន់តែស្រស់ស្រាយ អាចបន្ថែម តាសក់ និងស្លឹកជីរអង្កាម។ វាជួយបង្កើនក្លិន និងរសជាតិ ដោយមិនបន្ថែមជាតិស្ករច្រើន។ ចំណែក ទឹកឃ្មុំ អាចដាក់បានបន្តិចដើម្បីកាត់រសជាតិជូរ ប៉ុន្តែគួរគ្រប់គ្រងបរិមាណ ព្រោះទឹកឃ្មុំក៏ជាប្រភពជាតិស្ករដែរ។

អ្វីដែលគួរប្រុងប្រយ័ត្នគឺ កុំបន្ថែមស្ករ ទឹកឃ្មុំ ឬអំបិលច្រើនពេក ព្រោះអាចធ្វើឱ្យភេសជ្ជៈដែលគិតថាមានប្រយោជន៍ ក្លាយជាមានជាតិស្ករ ឬសូដ្យូមខ្ពស់។ ម្យ៉ាងទៀត ទឹកក្រូចឆ្មារមានជាតិអាស៊ីត ដូច្នេះការផឹកញឹកញាប់ ឬច្របាច់ទុកក្នុងមាត់អាចបង្កើនការសឹកស្រទាប់ការពារធ្មេញ។ បន្ទាប់ពីផឹក គួរលាងមាត់ដោយទឹកស្អាត និងកុំដុសធ្មេញភ្លាមៗ៕