យោងតាមការចុះផ្សាយពីប្រភពបរទេស ផ្ទះជាច្រើនជាពិសេសបន្ទប់ដែលបែរទៅទិសខាងលិច និងខាងត្បូង អាចក្តៅខ្លាំងនៅពេលរសៀល ដោយសារជញ្ជាំង ឥដ្ឋ បេតុង និងដំបូលស្រូបយកកម្ដៅពីព្រះអាទិត្យ ហើយបញ្ចេញកម្ដៅចូលក្នុងផ្ទះ។ ប្រសិនបើខ្យល់មិនអាចចេញចូលបានល្អ កម្ដៅនឹងជាប់នៅខាងក្នុង ធ្វើឱ្យបរិយាកាសក្តៅ និងអាប់អួរ។
វិធីងាយមួយគឺ ទប់ពន្លឺថ្ងៃមុនពេលវាចូលក្នុងផ្ទះ។ អាចបិទវាំងននការពារពន្លឺ ឬវាំងននក្រាស់នៅបង្អួចដែលទទួលពន្លឺខ្លាំង ចាប់ពីពេលថ្ងៃត្រង់ ហើយអាចប្រើហ្វីលម៍ការពារកម្ដៅសម្រាប់កញ្ចក់ផងដែរ។ ការដំឡើងត្រង់ស្រមោលខាងក្រៅ ដូចជា ដំបូលតូច របាំងពន្លឺ ឬវាំងននខាងក្រៅ ក៏អាចជួយកាត់បន្ថយពន្លឺដែលប៉ះជញ្ជាំង និងបង្អួចដោយផ្ទាល់បានល្អ។
បើកផ្លូវឱ្យខ្យល់ចេញចូល ក៏ជាចំណុចសំខាន់។ នៅពេលសមស្រប អាចបើកបង្អួចពីរខាងដែលនៅទល់មុខគ្នា ដើម្បីបង្កើតលំហូរខ្យល់ និងជួយបញ្ចេញខ្យល់ក្តៅ។ ប្រសិនបើមានកង្ហារបញ្ចេញខ្យល់ អាចដាក់ឱ្យបែរទៅខាងក្រៅបង្អួច ដើម្បីជួយបណ្តេញខ្យល់ក្តៅចេញពីបន្ទប់បានលឿនជាងមុន។
ការដាំ ដើមឈើ ឬរុក្ខជាតិដែលផ្តល់ម្លប់ នៅតំបន់ទទួលពន្លឺថ្ងៃខ្លាំង ក៏អាចជួយការពារជញ្ជាំងផ្ទះពីកម្ដៅដោយផ្ទាល់។ លើសពីនេះ នៅថ្ងៃដែលក្តៅខ្លាំង អាចស្រោចទឹកលើរុក្ខជាតិ ឬទីធ្លាបេតុងជុំវិញផ្ទះ ដើម្បីឱ្យទឹកហួត និងជួយបន្ថយកម្ដៅលើផ្ទៃ។ ទោះជាយ៉ាងណា គួរប្រើទឹកដោយសមស្រប និងប្រុងប្រយ័ត្នចំពោះផ្ទៃរអិល។
ចំណុចសំខាន់មួយទៀតគឺ ដាក់ស្រទាប់ការពារកម្ដៅនៅក្រោមដំបូល ឬលើពិដាន ព្រោះដំបូលជាតំបន់សំខាន់ដែលទទួលកម្ដៅពីព្រះអាទិត្យ។ ការប្រើសម្ភារៈអ៊ីសូឡង់អាចជួយកាត់បន្ថយកម្ដៅដែលបញ្ជូនចូលបន្ទប់ និងអាចជួយឱ្យម៉ាស៊ីនត្រជាក់ធ្វើការតិចជាងមុន។ ដូច្នេះ ការធ្វើឱ្យផ្ទះត្រជាក់មិនចាំបាច់ពឹងលើម៉ាស៊ីនត្រជាក់តែមួយទេ ប៉ុន្តែអាចចាប់ផ្តើមពីការទប់ពន្លឺថ្ងៃ បង្កើនចរន្តខ្យល់ បង្កើតម្លប់ និងការពារកម្ដៅពីដំបូល៕