យោងតាមការចុះផ្សាយពីប្រភពបរទេស ក្លិនតំបន់សម្ងាត់របស់ស្ត្រីអាចផ្លាស់ប្តូរបន្តិចបន្តួចតាមអាហារ អ័រម៉ូន និងសកម្មភាពប្រចាំថ្ងៃ។ អ្នកជំនាញរោគស្ត្រីបញ្ជាក់ថា ក្លិនដែលយើងសង្កេតឃើញ មិនចាំបាច់មកពីក្នុងទ្វារមាសផ្ទាល់ទេ ប៉ុន្តែអាចពាក់ព័ន្ធនឹងញើស ទឹកនោម និងសារធាតុរាវនៅតំបន់ជុំវិញផងដែរ។
អាហារដែលមានសារធាតុស្ពាន់ធ័រខ្ពស់ ដូចជា ខ្ទឹមស ខ្ទឹមបារាំង ប្រូខូលី ផ្កាខាត់ណា និងស្ពៃក្តោប អាចធ្វើឱ្យក្លិនរាងកាយផ្លាស់ប្តូរជាបណ្តោះអាសន្ន។ ចំណែកអាហារហឹរ គ្រឿងទេស កាហ្វេ និងគ្រឿងស្រវឹង ក៏អាចជំរុញការបែកញើស ឬបញ្ចេញសារធាតុមានក្លិន ដែលធ្វើឱ្យក្លិននៅតំបន់នេះកាន់តែសង្កត់សម្គាល់។
ជាទូទៅ ទ្វារមាសដែលមានសុខភាពល្អ មិនចាំបាច់មានក្លិនដូចផ្កា ទេ។ វាអាចមានក្លិនធម្មជាតិបន្តិច ហើយអាចប្រែប្រួលតាមវដ្តរដូវ និងអ័រម៉ូន។ ចំពោះការញ៉ាំម្នាស់ ឬផ្លែឈើផ្អែម ដើម្បីធ្វើឱ្យក្លិនតំបន់សម្ងាត់ផ្អែម ឬក្រអូបជាងមុន គេនៅមិនទាន់មានភស្តុតាងវេជ្ជសាស្ត្រគ្រប់គ្រាន់បញ្ជាក់ថាមានប្រសិទ្ធភាពឡើយ។
ប្រសិនបើក្លិនផ្លាស់ប្តូរបន្ទាប់ពីញ៉ាំអាហារមួយចំនួន ជាធម្មតាអាចបាត់ទៅវិញដោយខ្លួនឯង។ មិនគួរលាងសម្អាតចូលក្នុងទ្វារមាស ប្រើស្ព្រាយក្លិន ឬយកខ្ទឹមស និងឱសថផ្សេងៗទៅដាក់នៅតំបន់សម្ងាត់ឡើយ ព្រោះអាចរំខានដល់តុល្យភាពបាក់តេរី និងបង្កការរលាក ឬការឆ្លងមេរោគ។
ប៉ុន្តែប្រសិនបើមាន ក្លិនខ្លាំងខុសធម្មតា ជាពិសេសក្លិនដូចត្រី រួមជាមួយការធ្លាក់សខុសប្រក្រតី រមាស់ ក្រហាយ ឬឈឺ គួរទៅពិនិត្យជាមួយគ្រូពេទ្យ ព្រោះវាអាចជាសញ្ញានៃការឆ្លងមេរោគ ឬបញ្ហាផ្សេងៗ មិនមែនគ្រាន់តែបណ្តាលមកពីអាហារទេ៕