យោងតាមការចុះផ្សាយពីប្រភពបរទេស មនុស្សជាច្រើនគិតថា អ្នកមានជំងឺទឹកនោមផ្អែមអាចញ៉ាំបន្លែបានច្រើនតាមចិត្ត។ ប៉ុន្តែបន្លែ និងមើមមួយចំនួនមានជាតិកាបូអ៊ីដ្រាត ឬម្សៅខ្ពស់ ដែលបើញ៉ាំច្រើនអាចប៉ះពាល់ដល់ជាតិស្ករក្នុងឈាម។
ប្រភេទដែលគួរយកចិត្តទុកដាក់មាន ដំឡូងបារាំង ដំឡូងជ្វា ល្ពៅ ការ៉ុត មើមតយ៉េន និងពោត។ អាហារទាំងនេះមិនមែនជាអាហារហាមឃាត់ទេ ប៉ុន្តែគួរញ៉ាំក្នុងបរិមាណសមរម្យ និងគិតបញ្ចូលទៅក្នុងបរិមាណកាបូអ៊ីដ្រាតសរុបប្រចាំថ្ងៃ។
ជាពិសេស ដំឡូងបារាំង និងពោតមានម្សៅច្រើន ដូច្នេះប្រសិនបើញ៉ាំវា គួរកាត់បន្ថយបាយ មី ឬអាហារដែលមានម្សៅផ្សេងទៀតក្នុងពេលតែមួយ។ ដំឡូងជ្វា និងល្ពៅក៏អាចញ៉ាំបាន ប៉ុន្តែមិនគួរញ៉ាំក្នុងបរិមាណច្រើនជាមួយបាយទេ។
ចំពោះការ៉ុត និងមើមយ៉េន មិនចាំបាច់ជៀសវាងទាំងស្រុងឡើយ។ គួរជ្រើសរើសបរិមាណសមរម្យ និងចម្អិនដោយវិធីសាមញ្ញ ដូចជា ស្ងោរ ចំហុយ ឬឆាតិចប្រេង ជំនួសការចៀន ឬចម្អិនរហូតទន់ខ្លាំង។
សំខាន់បំផុត អ្នកមានជំងឺទឹកនោមផ្អែមគួរផ្តោតលើ បរិមាណកាបូអ៊ីដ្រាតសរុប ប្រភេទអាហារ និងទំហំមួយពេល មិនមែនហាមបន្លែទាំងអស់នោះទេ។ គួរបន្ថែមបន្លែដែលមិនសូវមានម្សៅ និងរក្សារបបអាហារមានតុល្យភាព ដើម្បីជួយគ្រប់គ្រងជាតិស្ករក្នុងឈាម៕