យោងតាមការចុះផ្សាយពីប្រភពបរទេស ការគ្រប់គ្រងទម្ងន់មិនចាំបាច់ពឹងផ្អែកលើការហាត់ប្រាណខ្លាំងៗទេ។ ការផឹកទឹកឱ្យគ្រប់ ជ្រើសរើសភេសជ្ជៈគ្មានស្ករ កាត់បន្ថយអាហារផ្អែម និងអាហារកែច្នៃ ព្រមទាំងគ្រប់គ្រងបរិមាណអាហារ អាចជួយគ្រប់គ្រងការទទួលកាឡូរីបាន។
អ្នកមិនសូវចូលចិត្តហាត់ប្រាណ អាចចាប់ផ្តើមពីការដើរ ឡើងជណ្តើរ រាំ ធ្វើកិច្ចការផ្ទះ និងក្រោកចលនាជាប្រចាំ ជំនួសឱ្យការអង្គុយយូរ។ សកម្មភាពខ្លីៗដែលធ្វើជាច្រើនដងក្នុងមួយថ្ងៃ ក៏អាចជួយបង្កើនចលនាប្រចាំថ្ងៃបានដែរ។
ចំពោះអាហារ គួរបន្ថែមបន្លែ ផ្លែឈើ ប្រូតេអ៊ីន និងគ្រាប់ធញ្ញជាតិពេញមូល ព្រមទាំងគ្រប់គ្រងបរិមាណអាហារ។ កុំទុកឱ្យឃ្លានខ្លាំងពេក ព្រោះអាចធ្វើឱ្យងាយញ៉ាំលើស ហើយបើញ៉ាំអាហារសម្រន់ គួរជ្រើសរើសអាហារដែលមានជាតិស្ករតិច។
ការគេងក៏ជាផ្នែកសំខាន់នៃការគ្រប់គ្រងទម្ងន់។ មនុស្សពេញវ័យភាគច្រើនគួរគេងប្រហែល ៧–៩ ម៉ោងក្នុងមួយយប់ ហើយគួររៀបចំម៉ោងញ៉ាំអាហារឱ្យសមរម្យ ជៀសវាងការញ៉ាំច្រើននៅពេលយប់ និងព្យាយាមគ្រប់គ្រងភាពតានតឹង។
ជាចុងក្រោយ កុំបង្ខំខ្លួនឯងឱ្យតមអាហារ ឬហាត់ប្រាណខ្លាំងក្នុងរយៈពេលខ្លី។ ការផ្លាស់ប្តូរទម្លាប់តូចៗ ដូចជា ញ៉ាំអាហារមានគុណភាព បង្កើនការធ្វើចលនា គេងឱ្យគ្រប់ និងធ្វើជាប់លាប់ គឺជាគន្លឹះសំខាន់សម្រាប់ការគ្រប់គ្រងទម្ងន់បានយូរអង្វែង៕