យោងតាមការចុះផ្សាយពីប្រភពបរទេស ការរត់ជាប្រចាំអាចជួយពង្រឹងសុខភាព បេះដូង និងកាយសម្បទា ប៉ុន្តែ មិនមានន័យថា ត្រូវរត់រាល់ថ្ងៃទើបល្អនោះទេ ជាពិសេសសម្រាប់អ្នកទើបចាប់ផ្តើម។
សម្រាប់អ្នកចាប់ផ្តើម គួរចាប់ផ្តើមប្រហែល ៣–៤ ដងក្នុងមួយសប្តាហ៍ និងទុកថ្ងៃសម្រាកឱ្យរាងកាយស្តារសាច់ដុំ និងសរសៃពួរ។ ការរត់ខ្លាំងពេក ឬរត់រាល់ថ្ងៃដោយមិនឱ្យរាងកាយសម្រាក អាចបង្កើនហានិភ័យរបួស និងធ្វើឱ្យបាត់បង់កម្លាំងចិត្តក្នុងការហាត់ប្រាណ។
អ្នកទើបចាប់ផ្តើមអាចដើរកម្តៅសាច់ដុំ ៥ នាទី បន្ទាប់មករត់ស្រាលៗ ១ នាទី ឆ្លាស់ជាមួយដើរ ១ នាទី ប្រហែល ១០ ជុំ ហើយបញ្ចប់ដោយដើរសម្រួល ៥ នាទី។ អនុវត្តបែបនេះរយៈពេលប្រហែល ៤–៦ សប្តាហ៍ មុនពេលបង្កើនចម្ងាយ ឬល្បឿន។
ចំណុចសំខាន់គឺ កុំប្រញាប់បង្កើនការហាត់ប្រាណ ព្រោះប្រព័ន្ធបេះដូងអាចសម្របខ្លួនបានលឿនជាងសាច់ដុំ និងសន្លាក់។ បើចង់បង្កើនសកម្មភាព អាចឆ្លាស់ជាមួយការជិះកង់ ហែលទឹក ឬហាត់ប្រាណប្រភេទផ្សេងៗ ដើម្បីឱ្យរាងកាយមានពេលសម្រាក និងស្តារខ្លួន៕