យោងតាមការចុះផ្សាយពីប្រភពបរទេស បន្ទប់ទឹកដែលសម្អាតជាញឹកញាប់ ប៉ុន្តែនៅតែមានក្លិនមិនល្អ មិនមែនតែងតែបណ្តាលពីកម្រាល ឬបង្គន់កខ្វក់ទេ។ ក្លិនអាចលាក់ខ្លួននៅកន្លែងដែលមើលមិនសូវឃើញ ដូចជា បំពង់បង្ហូរទឹក គម្របបំពង់ រន្ធថ្នេរក្បឿងការ៉ូ ជុំវិញបាតបង្គន់ វាំងននងូតទឹក កម្រាលជូតជើង និងក្រោមអាងលាងដៃ។
បំពង់បង្ហូរទឹកជាចំណុចសំខាន់មួយ ព្រោះសក់ កាកសាប៊ូ សាប៊ូកក់សក់ និងភាពកខ្វក់អាចកកស្ទះនៅខាងក្នុង បង្កឱ្យមានក្លិនស្អុយត្រឡប់មកវិញ។ គួរដកសក់ និងកាកសំណល់ចេញជាប្រចាំ ព្រមទាំងលាងសម្អាតគម្រប និងមាត់បំពង់ផងដែរ។
រន្ធថ្នេរក្បឿងការ៉ូ ជុំវិញបាតបង្គន់ និងផ្នែកខាងក្រោមគម្របបំពង់ ក៏អាចកកកុញសំណើម កាកសាប៊ូ និងផ្សិត ដែលបង្កក្លិនអាប់។ ដូចគ្នានេះដែរ វាំងននងូតទឹក និងកម្រាលជូតជើងដែលសើមជាប់ជាប្រចាំ អាចក្លាយជាប្រភពក្លិន និងផ្សិត ប្រសិនបើមិនបានបោកសម្អាត និងហាលឱ្យស្ងួតល្អ។
ក្រោមអាងលាងដៃក៏គួរតែពិនិត្យជាប្រចាំ ព្រោះអាចមានទឹកជ្រាបពីបំពង់ ឬសំណើមលាក់ខ្លួន។ ប្រសិនបើបន្ទប់ទឹកមានខ្យល់ចេញចូលមិនល្អ សំណើមនឹងកកស្ទះកាន់តែងាយ បង្កើនឱកាសកើតផ្សិត និងក្លិនអាប់។ ដូច្នេះ គួរបើកបង្អួច ឬកង្ហារបឺតខ្យល់ក្រោយពេលងូតទឹក និងជូតតំបន់ដែលសើមឱ្យស្ងួត។
សំខាន់បំផុត មិនគួរលាយទឹកសម្អាតប្រភេទផ្សេងៗចូលគ្នាដោយខ្លួនឯងឡើយ ព្រោះអាចបង្កឧស្ម័នដែលប៉ះពាល់ដល់ស្បែក ភ្នែក និងផ្លូវដង្ហើម។ ប្រសិនបើបន្ទប់ទឹកនៅតែមានក្លិនខ្លាំង បំពង់បង្ហូរទឹកហូរយឺត ទឹកត្រឡប់ឡើង ឬក្លិនកើតឡើងជាបន្តបន្ទាប់ ទោះបានសម្អាតហើយ ក៏គួរឱ្យជាងជំនាញពិនិត្យប្រព័ន្ធបំពង់ទឹក៕