​អ្នកមានជំងឺទឹកនោមផ្អែម គួរប្រុងប្រយ័ត្នបន្លែ និងមើម ៦ ប្រភេទនេះ

យោងតាមការចុះផ្សាយពីប្រភពបរទេស មិនមែនបន្លែគ្រប់ប្រភេទសុទ្ធតែអាចញ៉ាំបានដោយគ្មានកំណត់នោះទេ ជាពិសេសសម្រាប់អ្នកមានជំងឺទឹកនោមផ្អែម។ បន្លែ និងមើមមួយចំនួនមានជាតិកាបូអ៊ីដ្រាត ឬជាតិស្ករធម្មជាតិខ្ពស់ ដែលអាចប៉ះពាល់ដល់ជាតិស្ករក្នុងឈាម ប្រសិនបើញ៉ាំច្រើនពេក។

ដំឡូងបារាំង និងដំឡូងជ្វា មានជាតិម្សៅខ្ពស់ ដូច្នេះគួរញ៉ាំក្នុងបរិមាណសមរម្យ និងអាចប្រើជំនួសបាយ ឬនំប៉័ង ជាជាងញ៉ាំបន្ថែមពីលើអាហារម្សៅផ្សេងទៀត។

ល្ពៅ និងការ៉ុតមានវីតាមីន និងសារធាតុមានប្រយោជន៍ជាច្រើន ប៉ុន្តែការញ៉ាំច្រើន ឬចម្អិនរហូតទន់ខ្លាំង អាចធ្វើឱ្យរាងកាយស្រូបយកកាបូអ៊ីដ្រាតបានលឿនជាងមុន។ ដូច្នេះគួរគ្រប់គ្រងបរិមាណឱ្យសមរម្យ។

ប៊ីតរ៉ូតមានសារធាតុប្រឆាំងអុកស៊ីតកម្មល្អសម្រាប់សុខភាព ប៉ុន្តែមានជាតិស្ករធម្មជាតិច្រើនជាងបន្លែខ្លះៗ ដូច្នេះអ្នកមានទឹកនោមផ្អែមមិនគួរញ៉ាំក្នុងបរិមាណធំពេក។

ចំណែកពោត និងសណ្តែកសៀងខ្ចី (Edamame) ក៏គួរយកចិត្តទុកដាក់លើបរិមាណដែរ។ ពោតមានម្សៅខ្ពស់ ខណៈ Edamame ទោះសម្បូរប្រូតេអ៊ីនក៏ដោយ ក៏មានកាបូអ៊ីដ្រាត និងថាមពលផងដែរ។

ជាទូទៅ អ្នកមានជំងឺទឹកនោមផ្អែមមិនចាំបាច់ហាមអាហារទាំងនេះទាំងស្រុងទេ។ អ្វីដែលសំខាន់គឺគ្រប់គ្រងបរិមាណអាហារ ជ្រើសរើសបន្លែមិនសម្បូរម្សៅ និងចម្អិនដោយវិធីសុខភាពល្អ ដូចជា ស្ងោរ ចំហុយ ឬឆារហ័ស។ ការហាត់ប្រាណទៀងទាត់ គេងគ្រប់គ្រាន់ និងគ្រប់គ្រងភាពតានតឹង ក៏ជួយដល់ការគ្រប់គ្រងជាតិស្ករក្នុងឈាមផងដែរ។

សរុបមក បន្លែមិនមែនជាអាហារដែលអ្នកមានទឹកនោមផ្អែមត្រូវហាមទាំងអស់នោះទេ ប៉ុន្តែគួរជ្រើសរើសប្រភេទ និងគ្រប់គ្រងបរិមាណឱ្យបានត្រឹមត្រូវ៕