យោងតាមការចុះផ្សាយពីប្រភពបរទេស ផ្លែឈើមួយចំនួនមានកាឡូរីមិនខ្ពស់ និងសម្បូរជាតិសរសៃ ដែលអាចជួយឱ្យឆ្អែតបានយូរ កាត់បន្ថយការឃ្លាន និងជួយគ្រប់គ្រងទម្ងន់។ ផ្លែឈើដែលអាចបញ្ចូលក្នុងរបបអាហារមានដូចជា ក្រូចថ្លុង ម្នាស់ ឪឡឹក ផ្លែបឺរ គីវី ផ្លែប៉ោម ផ្លែសារី ក្រូច និងល្ហុង។
ផ្លែឈើទាំងនេះផ្តល់ជាតិសរសៃ វីតាមីន ទឹក និងសារធាតុចិញ្ចឹមផ្សេងៗ ដែលអាចជួយដល់ការរំលាយអាហារ និងការគ្រប់គ្រងចំណង់អាហារ។ ជាពិសេស ផ្លែឈើស្រស់ទាំងមូលគួរត្រូវបានជ្រើសរើសជាងទឹកផ្លែឈើ ព្រោះមានជាតិសរសៃច្រើនជាង។
ទោះជាយ៉ាងណា គ្មានផ្លែឈើណាអាចដុតខ្លាញ់ក្បាលពោះដោយផ្ទាល់បានទេ។ ប្រសិនបើចង់សម្រកទម្ងន់ គួររួមបញ្ចូលការគ្រប់គ្រងរបបអាហារ ការហាត់ប្រាណ និងការរស់នៅប្រកបដោយសុខភាពល្អ៕