ទូរស័ព្ទសព្វថ្ងៃអាចប្រើធ្វើអ្វីៗបានជាច្រើន ដូច្នេះវាគ្មានអ្វីគួរឱ្យឆ្ងល់ទេដែលមនុស្សមិនតិចនាក់សឹងតែចំណាយពេលវេលាពេញមួយថ្ងៃរបស់ពួកគេលេងទូរស័ព្ទ។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ទោះជាយ៉ាងណា ប្រសិនបើអ្នកប្រើប្រាស់ ឬលេងទូរស័ព្ទច្រើនពេកនោះ អ្នកប្រាកដជានឹងជួបប្រទះហានិភ័យនៃបញ្ហាសុខភាពគួរឱ្យព្រួយបារម្ភមិនខានឡើយ។ ថាតើបញ្ហាសុខភាពអ្វីខ្លះទៅដែលអ្នកអាចនឹងជួបប្រទះ? ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីហានិភ័យមួយចំនួននៃការញៀនលេងទូរស័ព្ទ ៖
១. បញ្ហាភ្នែក
ការសម្លឹងមើលអេក្រង់ទូរស័ព្ទជាប់ជានិច្ច ឬយូរ បណ្ដាលឱ្យស្រលៀងភ្នែក និងមានការសន្ធឹងសាច់ដុំភ្នែក។ ជាលទ្ធផលអ្នកអាចនឹងជួបប្រទះបញ្ហាខ្សោយការមើលឃើញ ឬមើលឃើញលែងច្បាស់។ ក៏ព្រោះទូរស័ព្ទដៃមិនដូចកុំព្យូទ័រដែលនៅមួយកន្លែងលើតុឡើយ ការសម្លឹងមើលវាគ្រប់ពេល គឺមានន័យថា អ្នកត្រូវសន្ធឹងសាច់ដុំភ្នែកជាប់ជានិច្ចផងដែរ។
២. ឈឺចាប់រាងកាយ
ដោយសារតែការប្រើទូរស័ព្ទតម្រូវឱ្យអ្នកដាក់ដៃកាន់ជាប់ និងប្រើប្រាស់ម្រាមដៃចុះឡើងៗ នោះលទ្ធផលនៃការឈឺចាប់ និងរលាកកដៃ ព្រមទាំងសន្លាក់ម្រាម គឺងាយនឹងកើតឡើងណាស់។ ទោះជាយ៉ាងណាក៏ដោយ ដៃមិនមែនជាផ្នែកតែមួយនៃរាងកាយដែលទទួលរងការឈឺចាប់ឡើយ ដោយការប្រើប្រាស់ ឬលេងទូរស័ព្ទច្រើនពេកក៏តម្រូវឱ្យអ្នកអោនចុះចំកោង-ក និងខ្នងផងដែរ។ ហើយមួយស្របក់ក្រោយមក អ្នកនឹងចុកក ឈឺខ្នង រួមទាំងស្មាសងខាងទៀត។
៣. ឆ្លងមេរោគ
នោះក៏ព្រោះតែទូរស័ព្ទមានផ្ទុកសម្បូរទៅដោយមេរោគច្រើនជាងចានបង្គន់ទៅទៀត! ជាពិសេស ប្រសិនបើអ្នកមិនសូវលាងដៃញឹកញាប់ នោះទូរស័ព្ទអាចបង្កជំងឺ និងរោគឆ្លងផ្សេងៗដល់អ្នកបានយ៉ាងងាយ។ អ្នកជំនាញជាច្រើននិយាយថា ទូរស័ព្ទអាចជាកន្លែងងាយនឹងប្រមូលផ្ដុំមេរោគច្រើនបំផុត ជាពិសេសប្រសិនបើអ្នកអនុញ្ញាតឱ្យអ្នកដៃទេប៉ះពាល់ ឬប្រើប្រាស់វា។
៤. ជំងឺថប់បារម្ភ និងធ្លាក់ទឹកចិត្ត (Depression)
មកទល់នឹងពេលបច្ចុប្បន្ន មនុស្សរាប់លានអ្នកនៅលើពិភពលោកកំពុងជួបប្រទះបញ្ហានៃជំងឺថប់បារម្ភ និងធ្លាក់ទឹកចិត្ត។ យោងតាមអ្នកឯកទេសខាងសុខភាពផ្លូវចិត្ត ភាគច្រើននៃបញ្ហាសុខភាពផ្លូវចិត្តអាចបណ្ដាលមកពីភាពតានតឹងក្នុងអារម្មណ៍។ ហើយអ្វីទៅជាមូលហេតុចម្បងដែលធ្វើឱ្យមនុស្សជាច្រើនសព្វថ្ងៃនេះមានអារម្មណ៍ស្ត្រេស? នោះ គឺការចំណាយពេលច្រើនលេងបណ្ដាញសង្គមតាមរយៈទូរស័ព្ទដៃរបស់ពួកគេ។ ផ្អែកលើការស្រាវជ្រាវមួយបង្ហាញថា អ្នកដែលចំណាយពេលរបស់ខ្លួនច្រើនលើទូរស័ព្ទ គឺងាយនឹងទទួលរងបញ្ហាថប់បារម្ភ និងធ្លាក់ទឹកចិត្ត ជាងអ្នកដែលមិនសូវលេងទូរស័ព្ទ៕