យោងតាមការចុះផ្សាយពីប្រភពបរទេស ការកក់សក់ពេលយប់ មិនមែនជារឿងអាក្រក់ទេ ប៉ុន្តែបញ្ហាអាចកើតឡើង ប្រសិនបើចូលគេងទាំងសក់ ឬស្បែកក្បាលនៅសើម។ ភាពសើមអាចធ្វើឱ្យស្បែកក្បាលងាយរមាស់ មានអង្គែ និងក្លិនអាប់ ព្រមទាំងបង្កើនការប្រមូលផ្តុំផ្សិត និងបាក់តេរី។
ដើម្បីកុំឱ្យព្រឹកឡើងសក់មានក្លិនអាប់ បន្ទាប់ពីកក់សក់ គួរប្រើកន្សែងមីក្រូហ្វៃប័រស្រូបទឹកថ្នមៗ ជៀសវាងជូត ឬកកិតសក់ខ្លាំងពេក។ បន្ទាប់មក គួរផ្លុំសក់ឱ្យស្ងួតប្រហែល ៩០–១០០% មុនចូលគេង ដោយផ្តោតជាពិសេសលើឫសសក់ និងស្បែកក្បាល។
គួរប្រើខ្យល់ក្តៅល្មម ឬខ្យល់ត្រជាក់ ជៀសវាងកំដៅខ្លាំងពេក និងកាន់ម៉ាស៊ីនផ្លុំសក់ឱ្យឆ្ងាយពីក្បាល។ ប្រសិនបើសក់វែង មិនគួរចងសក់តឹងនៅពេលនៅមានសំណើមទេ ព្រោះអាចធ្វើឱ្យសំណើមជាប់យូរ និងធ្វើឱ្យសក់ងាយបាក់។
ចំណែកឯប្រដាប់ខ្នើយ ក៏គួរប្តូរជាប្រចាំ ដើម្បីកាត់បន្ថយការប្រមូលផ្តុំញើស ប្រេង សំណើម និងធូលី។
គន្លឹះសំខាន់ៗ៖ ស្រូបទឹកសក់ថ្នមៗ → ផ្លុំឱ្យស្ងួតជិតទាំងស្រុង → ផ្តោតលើឫសសក់ → កុំចងសក់តឹងពេលនៅសើម → ប្តូរប្រដាប់ខ្នើយជាប្រចាំ។
សូមបញ្ជាក់ថា ការកក់សក់ពេលយប់មិនមែនជាមូលហេតុផ្ទាល់ដែលធ្វើឱ្យសក់ជ្រុះទេ។ សក់ជ្រុះខ្លះជារឿងធម្មតា ប៉ុន្តែប្រសិនបើជ្រុះច្រើនខុសធម្មតា គួរស្វែងរកមូលហេតុផ្សេងៗ ដូចជា ភាពតានតឹង អ័រម៉ូន អាហារ ឬបញ្ហាសុខភាព៕