យោងតាមការចុះផ្សាយពីប្រភពបរទេស ជំងឺខ្លាញ់រុំថ្លើមកើតឡើងនៅពេលមានជាតិខ្លាញ់កកកុញច្រើនក្នុងកោសិកាថ្លើម ហើយបើមិនគ្រប់គ្រង អាចប៉ះពាល់ដល់មុខងារថ្លើម និងបង្កហានិភ័យជំងឺថ្លើមធ្ងន់ធ្ងរ។ ការកែប្រែរបបអាហារ និងរបៀបរស់នៅ អាចជួយគ្រប់គ្រងបញ្ហានេះបាន។
១. គ្រប់គ្រងបរិមាណកាឡូរី
គួរកាត់បន្ថយការទទួលទានអាហារដែលមានកាឡូរីខ្ពស់ ព្រោះទម្ងន់លើសអាចធ្វើឱ្យខ្លាញ់កកកុញក្នុងថ្លើមកាន់តែច្រើន។
២. បន្ថែមអាហារសម្បូរជាតិសរសៃ
បន្លែស្លឹកបៃតង ផ្លែឈើស្រស់ គ្រាប់ធញ្ញជាតិ គ្រាប់ពូជ និងធញ្ញជាតិមិនចម្រាញ់ អាចជួយឱ្យឆ្អែតបានយូរ និងគាំទ្រដល់ការគ្រប់គ្រងទម្ងន់។
៣. ប្រើប្រេងបន្លែជំនួសខ្លាញ់សត្វ
អាចជ្រើសរើសប្រេងអូលីវ ប្រេងកាណូឡា ឬប្រេងល្ង ជំនួសខ្លាញ់សត្វ ដើម្បីកាត់បន្ថយការទទួលទានខ្លាញ់ឆ្អែត។
៤. ជ្រើសរើសប្រភពប្រូតេអ៊ីនដែលមានខ្លាញ់តិច
គួរបន្ថែមត្រី សាច់ទ្រូងមាន់ តៅហ៊ូ និងសណ្តែកក្នុងអាហារ ខណៈគួរកាត់បន្ថយសាច់ក្រហម និងសាច់ដែលមានខ្លាញ់ច្រើន។
៥. បន្ថែមអាហារដែលមានអូមេហ្គា-៣
ត្រីសាល់ម៉ុន ត្រីម៉ាការ៉ែល គ្រាប់ជី និងវ៉ាល់ណាត់ សម្បូរអូមេហ្គា-៣ ដែលអាចជួយគាំទ្រការរំលាយខ្លាញ់ និងកាត់បន្ថយការរលាកក្នុងរាងកាយ។
៦. ជៀសវាងស្រា និងអាហារមិនល្អចំពោះសុខភាព
អ្នកមានខ្លាញ់រុំថ្លើមគួរជៀសវាងស្រា ភេសជ្ជៈមានជាតិហ្គាស និងកាត់បន្ថយអាហាររហ័ស អាហារចៀន សាច់សរីរាង្គ និងនំផ្អែមៗ។
ក្រៅពីការកែប្រែអាហារ ការធ្វើលំហាត់ប្រាណកម្រិតមធ្យម ដូចជា ដើរ ហែលទឹក ឬយូហ្គា យ៉ាងហោចណាស់ ១៥០ នាទីក្នុងមួយសប្តាហ៍ ក៏អាចជួយកាត់បន្ថយការកកកុញខ្លាញ់ក្នុងថ្លើមបានផងដែរ។ គួររក្សាទម្ងន់ឱ្យសមស្រប ពិនិត្យសុខភាពជាប្រចាំ និងអនុវត្តតាមការណែនាំរបស់គ្រូពេទ្យ៕