យោងតាមការចុះផ្សាយពីប្រភពបរទេស មនុស្សជាច្រើនដឹងថា ការញ៉ាំផ្អែមច្រើនអាចធ្វើឱ្យឡើងទម្ងន់ និងបង្កើនហានិភ័យជំងឺទឹកនោមផ្អែម ប៉ុន្តែជាតិស្ករច្រើនក៏អាចប៉ះពាល់ដល់សុខភាពតម្រងនោមផងដែរ។
ការទទួលទានជាតិស្ករច្រើនជាប្រចាំ អាចនាំឱ្យឡើងទម្ងន់ ធាត់ និងបង្កើនហានិភ័យជំងឺទឹកនោមផ្អែមប្រភេទទី២។ ជំងឺទាំងនេះអាចធ្វើឱ្យសរសៃឈាមដែលចិញ្ចឹមតម្រងនោមខូច និងបង្កើនហានិភ័យជំងឺតម្រងនោមរ៉ាំរ៉ៃ។
ជាតិស្ករខ្ពស់ក៏អាចជំរុញឱ្យរាងកាយរក្សាជាតិសូដ្យូមច្រើន ដែលអាចធ្វើឱ្យសម្ពាធឈាមកើនឡើង និងបង្កសម្ពាធបន្ថែមលើតម្រងនោម។ ចំណែក fructose ប្រសិនបើទទួលទានច្រើន អាចជួយបង្កើនហានិភ័យកកើតគ្រួសក្នុងតម្រងនោមនៅមនុស្សមួយចំនួន។
ដូច្នេះ គួរកាត់បន្ថយ ទឹកក្រូច និងភេសជ្ជៈផ្អែម តែគុជ នំផ្អែម សូកូឡា ខូគី និងអាហារសម្រន់ដែលមានជាតិស្ករខ្ពស់។ គួរជ្រើសរើសទឹកស្អាត និងផ្លែឈើស្រស់ជំនួសភេសជ្ជៈផ្អែម ហើយរក្សារបបអាហារឱ្យមានតុល្យភាព។
ការរក្សាទម្ងន់ឱ្យសមស្រប គ្រប់គ្រងជាតិស្ករ និងសម្ពាធឈាម ហាត់ប្រាណជាប្រចាំ និងជៀសវាងការជក់បារី ក៏ជាវិធីសំខាន់ក្នុងការថែរក្សាសុខភាពតម្រងនោមផងដែរ។
សរុបមក ផ្អែមអាចញ៉ាំបាន ប៉ុន្តែគួរញ៉ាំក្នុងបរិមាណសមស្រប។ ការកាត់បន្ថយជាតិស្ករបន្ថែមក្នុងអាហារ និងភេសជ្ជៈ អាចជួយការពារទាំងទម្ងន់ ជាតិស្ករក្នុងឈាម និងសុខភាពតម្រងនោមក្នុងរយៈពេលវែង៕