យោងតាមការចុះផ្សាយពីប្រភពបរទេស ការទប់នោមម្តងម្កាល ដោយសារធ្វើដំណើរ ប្រជុំ ឬរកបន្ទប់ទឹកមិនទាន់ឃើញ អាចកើតមានចំពោះមនុស្សជាច្រើន។ ប៉ុន្តែការទប់នោមជាញឹកញាប់ ឬយូរពេក អាចបង្កផលប៉ះពាល់ដល់ប្លោកនោម និងប្រព័ន្ធផ្លូវទឹកនោមបាន។
នៅពេលទឹកនោមកើនឡើងក្នុងប្លោកនោម រាងកាយនឹងបញ្ជូនសញ្ញាទៅខួរក្បាលឱ្យមានអារម្មណ៍ចង់នោម។ ប្រសិនបើយើងបន្តទប់ សម្ពាធក្នុងប្លោកនោមអាចកើនឡើង និងធ្វើឱ្យប្រព័ន្ធបញ្ចេញទឹកនោមត្រូវធ្វើការខ្លាំងជាងធម្មតា។
ការទប់នោមយូរ និងជាប្រចាំ អាចបង្កើនហានិភ័យ ការឆ្លងមេរោគផ្លូវទឹកនោម ព្រោះទឹកនោមនៅក្នុងប្លោកនោមយូរ អាចផ្តល់ឱកាសឱ្យបាក់តេរីកើនចំនួន។ ក៏អាចធ្វើឱ្យមាន ការឈឺចាប់ត្រង់ពោះក្រោម នោមញឹក ឬមានអារម្មណ៍ថានោមមិនអស់ ហើយក្នុងករណីខ្លះ អាចប៉ះពាល់ដល់មុខងាររបស់ប្លោកនោម។
ដូច្នេះ នៅពេលមានអារម្មណ៍ចង់នោម គួរចូលបន្ទប់ទឹកឱ្យបានឆាប់តាមដែលអាចធ្វើទៅបាន មិនគួរធ្វើជាទម្លាប់ទប់នោមយូរឡើយ។ ប្រសិនបើមានអាការៈដូចជា ឈឺឬក្រហាយពេលនោម នោមមានឈាម ឈឺខ្នង ឬឈឺពោះក្រោមខ្លាំង គួរទៅពិគ្រោះជាមួយវេជ្ជបណ្ឌិត ដើម្បីរកមូលហេតុឱ្យបានច្បាស់៕