យោងតាមការចុះផ្សាយពីប្រភពបរទេស ការកសាងរាងកាយឱ្យរឹងមាំ និងកាត់បន្ថយខ្លាញ់ មិនមែនអាស្រ័យតែលើអ្វីដែលយើងញ៉ាំទេ ប៉ុន្តែថែមទាំងអាស្រ័យលើការរៀបចំអាហារឱ្យសមស្របនឹងថ្ងៃហាត់ប្រាណ និងថ្ងៃសម្រាកផងដែរ។
នៅថ្ងៃហាត់ប្រាណខ្លាំង គួរបង្កើនកាបូអ៊ីដ្រាតល្អ ដូចជា អង្ករសម្រូប និងធញ្ញជាតិ ដើម្បីផ្តល់ថាមពលសម្រាប់ការហាត់ និងជួយបំពេញថាមពលដែលបាត់បង់។ មុនហាត់ប្រហែល ១–២ ម៉ោង អាចញ៉ាំអាហារដែលងាយរំលាយ មានកាបូអ៊ីដ្រាត និងប្រូតេអ៊ីនបន្តិច ហើយគួរជៀសវាងអាហារខ្លាញ់ ឬមានជាតិសរសៃច្រើនពេក។
ក្រោយហាត់ គួរទទួលទានប្រូតេអ៊ីន និងកាបូអ៊ីដ្រាតក្នុងបរិមាណសមរម្យ ដើម្បីជួយស្តារសាច់ដុំ និងបំពេញថាមពលឡើងវិញ។ ចំណែកថ្ងៃសម្រាក ឬហាត់ស្រាល អាចបន្ថយកាបូអ៊ីដ្រាត និងជ្រើសរើសខ្លាញ់ល្អ ដូចជា ផ្លែប័រ គ្រាប់ធញ្ញជាតិ និងប្រេងអូលីវ។
ចំណុចសំខាន់មួយទៀតគឺ ប្រូតេអ៊ីនគួររក្សាឱ្យបានទៀងទាត់ទាំងថ្ងៃហាត់ និងថ្ងៃសម្រាក ព្រោះវាជួយជួសជុល និងបង្កើតសាច់ដុំ។ ជាមួយគ្នានេះ គួរសង្កេតភាពឃ្លាន កម្រិតថាមពល និងការឆ្លើយតបរបស់រាងកាយ ដើម្បីកែសម្រួលបរិមាណអាហារឱ្យសមស្រប។
សរុបមក ការញ៉ាំឱ្យត្រូវតាមសកម្មភាពប្រចាំថ្ងៃ អាចជួយគ្រប់គ្រងថាមពល កាត់បន្ថយខ្លាញ់ និងគាំទ្រការលូតលាស់សាច់ដុំបានល្អជាងការញ៉ាំក្នុងបរិមាណដូចគ្នារាល់ថ្ងៃ៕