​បើកម៉ាស៊ីនត្រជាក់គេងរាល់យប់ កុំធ្វើ ៥ ចំណុចនេះ! ជួយការពារសុខភាព និងសន្សំភ្លើង

យោងតាមការចុះផ្សាយពីប្រភពបរទេស ការបើកម៉ាស៊ីនត្រជាក់ពេលគេងអាចជួយឱ្យគេងបានស្រួល ប៉ុន្តែបើប្រើមិនត្រឹមត្រូវ អាចធ្វើឱ្យបំពង់ផ្លូវដង្ហើម និងស្បែកស្ងួត ព្រមទាំងធ្វើឱ្យខាតថាមពលដោយមិនដឹងខ្លួន។

ដើម្បីគេងក្នុងបន្ទប់ត្រជាក់បានស្រួល គួរយកចិត្តទុកដាក់លើចំណុចសំខាន់ៗទាំងនេះ។

កុំកំណត់សីតុណ្ហភាពទាបពេក គួរកំណត់ប្រហែល ២៥–២៦ អង្សាសេ ដើម្បីកុំឱ្យរាងកាយត្រូវប្រឈមនឹងភាពត្រជាក់ខ្លាំងពេកពេលគេង។

កុំឱ្យខ្យល់ត្រជាក់បក់ចំខ្លួនដោយផ្ទាល់ ព្រោះអាចធ្វើឱ្យបំពង់កស្ងួត ឈឺក ឬមានអារម្មណ៍មិនស្រួលនៅសាច់ដុំ។ គួរបង្វែរទិសខ្យល់ទៅជញ្ជាំង ឬពិដាន ដើម្បីឱ្យខ្យល់ត្រជាក់ចែកចាយបានស្មើៗគ្នា។

អាចប្រើកង្ហារកម្រិតស្រាលជួយចែកចាយខ្យល់ វាអាចជួយឱ្យបន្ទប់ត្រជាក់បានលឿន និងកាត់បន្ថយការចាំបាច់កំណត់ម៉ាស៊ីនត្រជាក់នៅសីតុណ្ហភាពទាបពេក។

ប្រសិនបើទិញម៉ាស៊ីនត្រជាក់ថ្មី អាចពិចារណាប្រព័ន្ធ Inverter ដែលអាចគ្រប់គ្រងការប្រើប្រាស់ថាមពលបានមានប្រសិទ្ធភាពជាងប្រព័ន្ធបើកបិទធម្មតា នៅពេលប្រើប្រាស់សមស្រប។

ប្រើមុខងារ Sleep និង Timer មុខងារ Sleep អាចជួយកែសម្រួលសីតុណ្ហភាពនៅពេលយប់ ខណៈ Timer អាចកំណត់ឱ្យម៉ាស៊ីនបិទដោយស្វ័យប្រវត្តិ ដើម្បីកាត់បន្ថយការប្រើភ្លើង និងការត្រជាក់ខ្លាំងពេក។

ក្រៅពីនេះ គួរផឹកទឹកឱ្យគ្រប់គ្រាន់ និងប្រើក្រែមផ្តល់សំណើម ប្រសិនបើស្បែកងាយស្ងួត។ ការរក្សាបន្ទប់ឱ្យស្អាត និងសម្អាតតម្រងម៉ាស៊ីនត្រជាក់ជាប្រចាំ ក៏សំខាន់សម្រាប់គុណភាពខ្យល់ និងសុខភាពផ្លូវដង្ហើមផងដែរ៕