យោងតាមការចុះផ្សាយពីប្រភពបរទេស ស្នាមជាំក្រហមនៅក ឬ Hickey គឺជាស្នាមជាំដែលកើតឡើងដោយសារសរសៃឈាមតូចៗក្រោមស្បែកបែកពីការបឺតខ្លាំង។ ជាទូទៅ វាអាចស្រកដោយខ្លួនឯងក្នុងរយៈពេលប្រហែល ១–២ សប្តាហ៍ ប៉ុន្តែអាចថែទាំឱ្យស្នាមស្រកបានលឿនជាងមុន។
ក្នុងរយៈពេល ៤៨ ម៉ោងដំបូង អាចប្រើកន្សែងរុំទឹកកកមកបង្ហាប់ថ្នមៗ ប្រហែល ១០–១៥ នាទី ដើម្បីជួយកាត់បន្ថយការហើម និងក្រហម។ បន្ទាប់ពីលើស ៤៨ ម៉ោង អាចប្តូរទៅបង្ហាប់ដោយកន្សែងក្តៅ ដើម្បីជួយឱ្យឈាមដែលកកស្ទះក្រោមស្បែកស្រូបចូលវិញបានល្អ។
ក្រៅពីនេះ អាចប្រើជែលប្រទាលកន្ទុយក្រពើ ឬផលិតផលថែស្បែកដែលមានវីតាមីន C ឬ K ដើម្បីជួយបន្ថយការរលាក និងស្នាមជាំ។ ប្រសិនបើត្រូវចេញក្រៅបន្ទាន់ អាចប្រើគ្រឿងសម្អាងដើម្បីបិទបាំងស្នាមបាន។
អ្វីដែល មិនគួរធ្វើ គឺយកកាក់ ស្លាបព្រា ឬវត្ថុរឹងមកកោស និងកុំចុច ឬម៉ាស្សាខ្លាំងៗ ព្រោះអាចធ្វើឱ្យសរសៃឈាមខូចកាន់តែច្រើន និងធ្វើឱ្យស្នាមជាំកាន់តែច្បាស់។
ប្រសិនបើស្នាមនៅតែមិនបាត់ក្រោយ ២ សប្តាហ៍ ឬមានការឈឺចាប់ ហើមខ្លាំង ឬមានរោគសញ្ញាមិនប្រក្រតី គួរទៅពិគ្រោះជាមួយគ្រូពេទ្យ៕