យោងតាមការចុះផ្សាយពីប្រភពបរទេស កាហ្វេអាចធ្វើឱ្យធ្មេញមានស្នាមប្រឡាក់ និងលឿងបន្តិចម្តងៗ ដោយសារសារធាតុពណ៌ និងអាស៊ីតក្នុងកាហ្វេ។ ប៉ុន្តែអ្នកមិនចាំបាច់ឈប់ផឹកកាហ្វេទេ ប្រសិនបើចេះថែរក្សាធ្មេញឱ្យបានត្រឹមត្រូវ។
១. ប្រើបំពង់បឺត ជួយកាត់បន្ថយការប៉ះផ្ទាល់របស់កាហ្វេជាមួយធ្មេញខាងមុខ។
២. ផឹកទឹកតាមក្រោយ ឬខ្ពុរមាត់ជាមួយទឹកស្អាត ដើម្បីជួយលាងសំណល់កាហ្វេចេញពីមាត់។
៣. កុំចំណាយពេលច្រើនម៉ោងចាំផឹក គួរផឹកឱ្យអស់ក្នុងរយៈពេលខ្លី ជំនួសការបឺតបន្តិចម្តងៗពេញមួយថ្ងៃ។
៤. កុំដុសធ្មេញភ្លាមៗ បន្ទាប់ពីផឹកកាហ្វេ ព្រោះអាស៊ីតអាចធ្វើឱ្យស្រទាប់ការពារធ្មេញទន់ជាបណ្តោះអាសន្ន។ គួររង់ចាំប្រហែល ៣០នាទីសិន។
៥. អាចបន្ថែមទឹកដោះគោ ប្រសិនបើអ្នកចូលចិត្ត ព្រោះប្រូតេអ៊ីនក្នុងទឹកដោះគោអាចជួយកាត់បន្ថយការជាប់របស់សារធាតុពណ៌ពីកាហ្វេលើធ្មេញ។
សរុប៖ អ្នកនៅតែអាចរីករាយជាមួយកាហ្វេបាន ប៉ុន្តែគួររក្សាអនាម័យមាត់ និងកុំឱ្យធ្មេញប៉ះកាហ្វេរយៈពេលយូរ ដើម្បីជួយកាត់បន្ថយស្នាមប្រឡាក់៕