យោងតាមការចុះផ្សាយពីប្រភពបរទេស មនុស្សជាច្រើនចង់មានសុខភាពល្អ ប៉ុន្តែបែរជារកហេតុផលដើម្បីជៀសវាងការហាត់ប្រាណ។ ប្រសិនបើអ្នកកំពុងជួបបញ្ហានេះ អាចសាកល្បងវិធីទាំង ៥ ខាងក្រោម ដើម្បីបង្កើតទម្លាប់ហាត់ប្រាណឱ្យបានទៀងទាត់។
១. កំណត់គោលដៅដែលអាចធ្វើបាន
កុំកំណត់គោលដៅធំពេក ឬរំពឹងថានឹងឃើញលទ្ធផលក្នុងរយៈពេលខ្លី។ គួរកំណត់ថា តើអ្នកនឹងហាត់ប្រាណប៉ុន្មានថ្ងៃក្នុងមួយសប្តាហ៍ ដើម្បីឱ្យងាយអនុវត្ត និងបន្តបានយូរ។
២. បង្កើតកម្លាំងចិត្តឱ្យខ្លួនឯង
សាកល្បងហាត់ប្រាណជាមួយមិត្តភក្តិ ឬបង្កើតបេសកកម្មហាត់ប្រាណជាក្រុម។ ការមានមិត្តរួមដំណើរអាចជួយឱ្យអ្នកមានការលើកទឹកចិត្ត និងមិនងាយបោះបង់។
៣. ស្វែងរកអ្នកជំនាញជួយណែនាំ
ប្រសិនបើមិនដឹងថាគួរចាប់ផ្តើមពីណា អាចស្វែងរកគ្រូបង្ហាត់ ឬអ្នកជំនាញផ្នែកហាត់ប្រាណ ដើម្បីទទួលបានការណែនាំអំពីលំហាត់ដែលសមស្របនឹងសមត្ថភាពរបស់ខ្លួន។
៤. ជ្រើសរើសការហាត់ប្រាណដែលខ្លួនចូលចិត្ត
កុំចាំបាច់ហាត់តាមអ្នកដទៃ។ អ្នកអាចជ្រើសរើសការរត់ ហែលទឹក យូហ្គា ភីឡាទីស រាំ អារ៉ូបិក ឬហាត់កាយសម្បទា តាមអ្វីដែលខ្លួនចូលចិត្ត។ ពេលធ្វើអ្វីដែលចូលចិត្ត វាងាយក្លាយជាទម្លាប់ប្រចាំថ្ងៃ។
៥. កត់ត្រាការផ្លាស់ប្តូរ
កត់ត្រាការហាត់ប្រាណ និងការផ្លាស់ប្តូររបស់រាងកាយជាប្រចាំ ដូចជា ទម្ងន់ កម្លាំងរាងកាយ ឬសមត្ថភាពក្នុងការធ្វើលំហាត់។ ការមើលឃើញការរីកចម្រើនរបស់ខ្លួន អាចជួយបង្កើនទឹកចិត្តឱ្យបន្តហាត់ប្រាណ។
ការចាប់ផ្តើមមិនចាំបាច់ធ្វើឱ្យខ្លាំងភ្លាមៗទេ។ ចាប់ពីអ្វីដែលអាចធ្វើបាន និងធ្វើជាប្រចាំ នោះនឹងជួយឱ្យការហាត់ប្រាណក្លាយជាទម្លាប់ និងជួយថែរក្សាសុខភាពបានរយៈពេលវែង។